Veiði | mbl | 27.9.2018 | 15:22 | Uppfært 16:03

60 laxar á 10 tímum á 4 stangir

Stórlax úr Stóru-Laxá. Veiðin síðasta sólahringinn hefur verið með ólíkindum. Sextíu löxum landað á fjórar stangir. Ljósmynd/Árni Baldursson

Stóra-Laxá er ein af þeim ám sem býður upp á ævintýri á haustin, þegar laxinn gengur upp úr Hvítá af Iðunni. Oft eru þessar göngur kraftmiklar og veiðimenn í Stóru gera hreinlega mokveiði. Veiðimenn sem eru á svæði eitt og tvö í Stóru-Laxá lentu í mokveiði síðdegis í gær. Þeir lönduðu 35 löxum á fimm klukkutímum á fjórar stangir. „Það var allt í keng allan tímann,“ sagði Egill Guðjohnsen tannlæknir í samtali við Sporðaköst í dag. Hann deilir stöng með starfsbróður sínum og veiðifélaga – Tóta tönn. Þeir félagar lönduðu átján löxum í gær. Sá síðasti sem þeir lönduðu var jafnframt sá stærsti, 103 sentimetra hængur sem tók í Bergsnös. „Þar eru alltaf stórir,“ segir Egill. Það var einmitt hann sem setti í hann í ljósaskiptunum á Collie Dog-túbu. „Ég var þrjú kortér með hann og það var komið svartamyrkur þegar við lönduðum honum.“ Myndin sem fylgir með af Agli með stórlaxinn mun seint vinna til verðlauna sem veiðimynd en gefur þó hugmynd um hversu stór fiskurinn var og hversu dimmt var orðið. Egill Guðjohnsen er hluti af þessari mynd sem félagi hans tók.

Egill segir þetta hafa verið mikið ævintýri. „Við komum til dæmis í Ytri-Hvamm og þar tókum við tíu laxa í beit og misstum fjóra.“

Egill segir að í gær hafi tvær stórar göngur komið upp í Stóru-Laxá. Í dag var áin hratt fallandi og vildi Egill meina að við þær aðstæður minnkaði veiðin á svæði 1 og 2 og fiskurinn gengi áfram upp ána. Meira en helmingurinn af þeim fiski sem þeir félagar Egill og Tóti lönduðu voru tveggja ára fiskar.

Síðast þegar Tóti tönn var í stóru viðtali sagði hann að alls væri hann búinn að veiða 20.511 laxa. Aðspurður hver talan væri núna svaraði hann: „Ég á eftir að leggja saman.“

Veiðin í morgun var áfram góð og lönduðust 25 laxar fyrir hádegi. Þeir byrjuðu ekki að veiða fyrr en klukkan átta í morgun og er hollið því komið með sextíu laxa á fjórar stangir á tíu klukkutímum. Egill segir að oft hafi veiðin verið góð á þessum tíma í Stóru-Laxá en hann man ekki eftir svona mokveiði.

Þessi veiðimynd vinnur seint til verðlauna, en fyrir þá sem sjá vel má greina að hér er Egill með 103 sentimetra hænginn úr Bergsnös. Ljósmynd/Aðsend

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.