Veiði | mbl | 27.9.2018 | 21:41 | Uppfært 28.9.2018 4:04

Enn ein sleggjan úr Eldvatninu

Ólafur Tómas með sjóbirtinginn – enn eina sleggjuna úr Eldvatni. Þessi mældist 89 sentimetrar. Ljósmynd/Aðsend

Eldvatnið í Skaftafellssýslum hefur gefið góða sjóbirtingsveiði í haust. Ríflega 400 fiskar eru komnir á land og þó nokkrar sleggjur. Einn slíkur fiskur veiddist í dag og var það Ólafur Tómas Guðbjartsson sem landaði fiskinum. Hann tók fluguna Humungus gold í veiðistaðnum Feðgum.

Ólafur Tómas sagði í samtali við Sporðaköst að viðureignin hefði staðið í einungis tíu mínútur. „Hann kom sem betur fer til okkar. Hann tók nokkrar svakalegar rokur og fór langt niður á undirlínu.“

Ólafur Tómas hafði orð á því í færslu á Facebook af þessum íturvaxna sjóbirtingi að hann hefði mætt of seint í veiðina. „Já. Jeppinn var bilaður. Fór í honum vindustöng en ég náði sem betur fer að fá nýja og komst í tæka tíð.“

Ólafur Tómas nýtur mikilla vinsælda á Snapchat undir „dagbok urrida“. Aðspurður sagði hann að því miður yrði ekkert snap frá þessu. „Þetta er ekki stærsti fiskurinn hér í haust. Sá stærsti er 98 sentimetrar.“

Hann var með nettar græjur, Redington Crux fyrir línu fimm og stöngin í U-beygju allan tímann eins og hann lýsir þessu sjálfur.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.