Stórfiskur úr Tungufljóti

Sjó­birt­ing­ur sem mæld­ist 96 senti­metr­ar veidd­ist í Tungufljóti í dag. Skil­yrði voru afar erfið, 3ja gráðu frost og vind­ur 10 - 12 metr­ar á sek­úndu. Veiðimaður­inn Lár­us Lúðvíks­son var afar ánægður með þenn­an happa­drátt, en svo stór­ir sjó­birt­ing­ar eru sjald­gæf­ir.

Veiði var góð í Tungufljóti í gær en rokið og frostið í dag gerðu það að verk­um að menn voru lítið við veiðar. Nú þegar nokkuð er liðið á dag er vind­ur geng­inn niður og hugsa menn sér gott til glóðar­inn­ar í húm­inu.

Sjó­birt­ing­ur­inn veidd­ist við Flögu­bakka og tók Black Ghost skull. Þegar Sporðaköst heyrðu í veiðimönn­um við Tungufljót nú síðdeg­is voru komn­ir á land tólf fisk­ar. Viður­eign­in við stór­fisk­inn við Flögu­bakka tók um tutt­ugu mín­út­ur og er um að ræða dæmi­gerðan vor­hæng. Aðeins fall­inn en engu að síður fal­leg­ur fisk­ur eins og mynd­in ber með sér.

• Blogga um frétt

Sein­ustu hundraðkall­ar sum­ars­ins