Eldisvakt í Langadalsá í sumar

Gert er ráð fyrir því að báðar þekktustu laxveiðiár Vestfjarða verði vaktaðar með myndavélabúnaði í teljurum í sumar. Vöktunin miðar að því að fylgjast með og meta hlutdeild laxa af eldisuppruna í ánum. Slíkt vöktunarkerfi var sett upp í Laugardalsá í fyrra og framkvæmdir eru að hefjast við Langadalsá á næstu vikum og er stefnt að því að það verði komið í gagnið fyrir upphaf veiðitíma. Báðar eru árnar í Ísafjarðardjúpi. Þetta kemur fram í skýrslum um vöktunarrannsóknir sem Sigurður Már Einarsson fiskifræðingur og Ingi Rúnar Jónsson unnu og kom út í febrúar síðastliðnum.

Glímt við lax í Langadalsá. Lax-á

Annað árið í röð veiddist eldislax í Laugardalsá, í fyrra. Laxins varð ekki vart í teljaraskráningu og er talið að hann hafi gengið í ána þegar teljarinn var bilaður í ágústmánuði. Eldislaxinn reyndist vera af norskum uppruna og kom úr stroki frá eldisstað Arnarlax við Hringsdal í Arnarfirði. Sumarið 2017 veiddist einnig fiskur í Laugardalsá sem talinn var eldisfiskur. Frétt þess efnis birtist á vef bb.is þann 28. september og var talið af sérfræðingum Hafrannsóknastofnunar að fiskurinn væri eldisfiskur. Bæði var hann uggaskemmdur og með samgróninga í innyflum sem geta komið í kjölfar bólusetningar eldisseiða, en slíkt sést ekki í villtum fiskum.

Hinn meinti eldislax úr Laugardalsá sem veiddist í september 2017. Annar slíkur veiddist í fyrra. Jóhann Birgisson

Fiskiteljarinn í Laugardalsá komst í gagnið í byrjun júní í fyrra og var starfræktur fram til 11. október, að því er kemur fram í vöktunarskýrslu þeirra Sigurðar Más og Inga Rúnars fyrir vatnasvæðið, sem kom út í janúar. Nokkur vandamál komu upp með teljarann, bæði vegna mikils lífræns reks í ánni og einnig settust bæði þörungar og mosi á búnaðinn. Þá kom upp bilun í ágúst. Til stendur að gera nokkrar breytingar á búnaðinum fyrir sumarið sem er fram undan til að minnka mögulegar rekstrartruflanir.

• Blogga um frétt

Seinustu hundraðkallar sumarsins