Veiði | mbl | 22.5.2019 | 11:16 | Uppfært 14:50

Súddi mokar upp bleikju fyrir austan

Sigurður Staples eða Súddi segir bleikjuna fyrir austan vera fyrr á ferðinni þetta árið. Ljósmynd/Aðsend

Súddi eða Sigurður Staples, staðarhaldari í Breiðdalsá, hefur verið í mikilli bleikjuveiði undanfarna daga. Bæði er bleikjan mætt í Fögruhlíðarós og einnig á ósasvæði Breiðdalsár. Súddi segir að bleikjan sé fyrr á ferðinni í ár, en hann er enn að bíða eftir að stóra bleikjan láti sjá sig.

Fögruhlíðarós stendur alveg undir nafni í vorlogninu. Mikið af bleikju er á ferðinni með fallaskiptum. Ljósmynd/Aðsend

„Ég er búinn að gera fína veiði hérna dag eftir dag. Og ég er búinn að strippa svo mikið að ég er kominn með skurð í puttann. Hvað getur maður gert til að verja á sér puttann?“ spyr Súddi. Plástrarnir detta bara af og karlinn er kominn ofan í kjöt. Það er stungið upp á hlífðarhanska eins og kjötiðnarmenn nota. Súdda líst vel á það.

„Það kom alveg óhemja af bleikju á innfallinu, hér í Fögruhlíðarós,“ sagði Súddi spurður um aflabrögð. Hann segir bleikjuna frekar smáa, þó hafi komið skot þar sem stærri bleikjan hafi verið að gefa sig. „Við byrjuðum hérna klukkan fjögur í morgun.“

Hvernig er í Breiðdalsánni? Er bleikjan komin þar líka?

„Já ég er búinn að skjótast þangað tvisvar og í bæði skiptin fengið sex bleikjur. Þær voru af öllum stærðum.“

Svona meiðsli eru alþekkt hjá veiðimönnum. En þetta er helst til snemmt að vera orðinn blóðstrippaður í maí. Ljósmynd/Súddi

Súddi segist aldrei hafa orðið var við bleikjuna svona snemma í Fögruhlíðarósi. Hann ákvað að byrja að kanna málið fyrr en vanalega og 15. maí fór hann í fyrstu tilraunaveiðina og hann og félagi hans fengu 24 bleikjur. Stærstu bleikjurnar voru upp í 48 sentimetrar. Í fyrra fór hann í fyrstu veiðina þar 25. maí.

„Við erum ekki með tölu á þessum fiskum. Við vorum að reyna að reikna þetta út áðan og ætli það séu ekki komnar einhverjar sextíu bleikjur á land. Við sleppum þessu öllu og erum ekki að telja með þær smæstu. En við erum enn að bíða eftir þessari stóru sem nær upp í fimm pund. Við urðum aðeins varir við þær fyrst þegar við fórum en maður þarf að bíða eftir innfallinu og þá mætir hún í miklu magni. Vonandi fara þessar stóru að láta sjá sig.“

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.