Veiði | mbl | 29.5.2019 | 14:46 | Uppfært 30.5.2019 12:48

Hundrað fiska vakt í Mývatnssveit

Bræðurnir Sigurjón og Hafþór Bjarni með 60 sentímetra urriða úr Geirastaðaskurði. Nokkuð hlýnaði þegar leið á daginn, en menn voru kátir með veiðina. Ljósmynd/BJ

Veiði á urriðasvæðinu í Mývatnssveit hófst í morgun. Óhætt er að segja að veiðin hafi verið mjög góð og gaf fyrri vaktin hátt í hundrað urriða. Vetrarríki tók á móti veiðimönnum í morgun. Alhvít jörð og hitastig ein gráða. Svona skilyrði hafa meiri áhrif á veiðimenn en urriðann. Það kom fljótt í ljós og settu menn í fiska vítt og breitt um svæðið. Einn þeirra sem er að veiðum í Laxá er Bjarni Júlíusson, fyrrverandi formaður Stangaveiðifélags Reykjavíkur. Hann er með sonum sínum þeim Hafþóri Bjarna og Sigurjóni Bjarna. Allir voru þeir búnir að lenda í góðri veiði. Þeir voru á svæði sem kallast Geirastaðir og er mjög ofarlega.

Árni Friðleifsson mótorhjólalögga með urriða úr Garðsenda. Báðum frekar kalt en veiðin var góð. Hofstaðaey gaf tólf fiska í morgun. Ljósmynd/Aðsend

„Það fraus í lykkjum hjá okkur í morgun þegar við vorum að byrja. Ég sit nú inni í bíl og er að horfa á strákana veiða. Úbbs þarna setti Sigurjón í fisk. Þetta er dásamlegt. Ég er búinn að landa tveimur og fá einhverjar tíu tökur. Það var ekki mikið líf í Skurðinum sjálfum en víða höfum við orðið varir við fisk,“ sagði Bjarni Júlíusson í samtali við Sporðaköst í morgun.

Þrátt fyrir kuldann og stöku haglél voru þeir feðgar kátir og nutu sín í botn. Snjóinn tók upp þegar hlýnaði um örfáar en dýrmætar gráður.

Það var vetrarlegt um að litast í morgun. Hér er hluti veiðimanna að gera sig klára í morgunsárið. Ljósmynd/SVFR

Þegar fyrstu vaktinni var lokið í Mývatnssveitinni kom í ljós að menn höfðu víða verið að gera góða veiði. Hofstaðaey stóð heldur betur undir væntingum og gerði Árni Friðleifsson ásamt félögum sínum flotta veiði. Svæðin gáfu misjafna veiði en öll voru að gefa eitthvað. Sum reyndar mjög góða veiði eins og Geldingaey, Helluvað og Hofsstaðaland. Veiðimenn sem veiddu Brotaflóa voru í miklu lífi og fiskur um allan flóa. Veitt var til klukkan tvö og þegar drjúgur hluti veiðimanna var kominn í hús var ljóst að fyrsta vaktin gaf hátt í hundrað fiska, sem er mögnuð veiði í þessari dásemdar perlu sem Mývatnssveitin er.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.