Góð byrjun í Skjálfandafljóti

Veiði hófst í Skjálfandafljóti í gær og lofar fyrsti dagur góðu um framhaldið. Alls komu sex laxar á land og voru aðstæður góðar. Stefán Sigurðsson hjá Iceland Outfitters sem er með ána á leigu sagði í samtali við Sporðaköst í gær að opnunin hefði verið virkilega góð. „Það voru að koma fiskar víða og það virðist sem laxinn hafi dreift sér ágætlega. Við þurfum ekki að hafa áhyggjur af vatnsleysi í Skjálfandafljótinu.“

Alls komu sex laxar á land í gær sem var opnunardagur. Tveir laxar veiddust í Barnafelli og fjórir á svokölluðum Austurbakka. Þá misstu veiðimenn að auki tvo væna laxa. Skjálfandafljót er magnað veiðivatn með mikilli bakkalengd og ógrynni veiðistaða. Þar þarf víða að ganga en þeir sem nenna að leggja á sig slíkt ferðalag uppskera oft í samræmi við dugnað.

Sveinn Aðalgeirsson með fallegan tveggja ára lax úr Barnafelli. Ljósmynd/Adam Á. Óskarsson

• Blogga um frétt

Seinustu hundraðkallar sumarsins