Veiði | mbl | 21.6.2019 | 16:02

Bingó í Brennunni

Ingólfur Ásgeirsson leigutaki er afskaplega ánægður með stöðuna í Brennunni. Hann bíður í ofvæni eftir rigningu. Sigurjón Sigurjónsson

Hörkugóð veiði hefur verið í Brennunni í Borgarfirði, síðustu daga. 28 löxum hefur verið landað á svæðinu síðustu fimm vaktir, eða í tvo og hálfan dag. Þetta eru langþráðar fréttir og færa sönnur á það að fiskur er að mæta og það er fyrst og fremst vatnsleysi sem kemur í veg fyrir að hann gangi upp.

Einn af mörgum stórlöxum úr Brennunni sem veiðst hafa síðustu daga. Ljósmynd/Aðsend

Nánast allir laxarnir sem veiddust í Brennunni eru tveggja ára fiskar úr sjó og virkilega vel haldnir. „Öllum þessum fiski var sleppt og það voru bara örfáir smálaxar í þessu. Mér finnst hins vegar bestu fréttirnar í þessu vera að þarna sést svo áþreifanlega hversu stórlaxinn er að sækja í sig veðrið hér í Borgarfirðinum,“ sagði Ingólfur Ásgeirsson leigutaki.

Ingólfur segir að mjög mikið sé af laxi á svæðinu og viðbúið að hann gangi af stað um leið og fer að rigna og vatnsborð hækkar.

Sökum vatnsleysis er afar dræm veiði í mörgum af helstu laxveiðiám landsins. Það ástand mun ekki lagast fyrr en hressileg rigning lætur sjá sig.

Brennan er neðsta svæðið í Þverá, þar sem hún rennur út í Hvítá. Veitt er á þrjár stangir í Brennunni.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.