Veiðibann í Skotlandi og Englandi

Stangaveiði er bönnuð í Skotlandi og Englandi, í það minnsta fram í miðjan apríl. Þetta er hluti af þeim aðgerðum sem bresk stjórnvöld hafa gripið til svo sporna megi við smiti á kórónaveirunni sem veldur Covid-19-sjúkdómnum.

Þetta bann gildir um svo gott sem flestar ár, í það minnsta sem Sporðaköst hafa upplýsingar um. Nokkuð er síðan veiðitímabilið hófst í Bretlandi og Skotlandi og höfðu veiðimenn birt töluvert af myndum af sér með fyrstu vorlaxana. Segja má að bannið sé afleiðing af útgöngubanni sem tók gildi 23. mars í landinu. Reglurnar eru þær að fólk má einu sinni á dag fara og kaupa nauðsynjar. Þá má fólk fara út einu sinni á dag til hreyfa sig og geta fjölskyldur farið saman en fólk má ekki hittast og ganga eða æfa saman.

Nokkur umræða hefur orðið um þetta bann á samfélagsmiðlum og ríkir skilningur meðal veiðimanna á þessum aðgerðum. Sú stofnun sem stjórnar veiðum í Skotlandi sendi frá sér tilmæli til allra veiðifélaga og óskaði eftir að menn virtu þau tilmæli að loka veiðisvæðunum. Vísað er til þess að veiði kallar oft á töluverð ferðalög og þau geti ekki flokkast sem bráðnauðsynleg og því síður að veiði falli undir skilgreininguna nauðþurftir, þótt einhverjir kunni að mótmæla því.

Kalla á lögreglu

Nokkur tilvik hafa komið upp þar sem tilkynnt hefur verið að fólk sé að veiða. Eitt slíkt kom upp á svæði í ánni Tay og var kölluð til lögregla þar sem þrír menn voru saman á báti að veiða. Við eftirgrennslan lögreglu kom í ljós að um landeigendur var að ræða og aðhafðist lögregla því ekkert í málinu. Þá hafa veiðiverðir við ána Dee í tvígang tekið veiðiþjófa og er almenningur hvattur til að láta vita ef sést til einhverra við slíka iðju.

Um miðjan apríl verða reglur um útgöngubann endurskoðaðar í Englandi og Skotlandi og þá mögulega opnast fyrir veiði á nýjan leik. Hins vegar er ljóst að veiðiiðnaðurinn í þessum löndum verður fyrir miklu tjóni þetta sumarið. Erlendir veiðimenn eiga ekki möguleika á að komast til þessara svæða og algerlega er óvíst hvenær flug kemst á með eðlilegum hætti.

• Blogga um frétt

Seinustu hundraðkallar sumarsins