17 punda urriði betri en öll páskaegg

Á meðan flestir landsmenn voru að rífa upp og brjóta páskaegg óð Páll Ágúst Ólafsson út í Ytri-Rangá. Hann var að taka fyrsta kast sumarsins og það var snjókoma og hiti við frostmark. Norðanstrengur gerði þetta allt enn kaldara. 

„Þetta var bara fyrsta kastið í Breiðabakka og flugan náði varla að lenda þegar fiskur tók hana. Þetta var Black Ghost og ég var ekki einu sinni byrjaður að strippa fluguna,“ sagði Páll Ágúst í samtali við Sporðaköst.

„Mér fannst hann illa tekinn svo ég tók mjög varlega á honum. Datt jafnvel í hug að hann væri húkkaður. Viðureignin stóð líka í tæpan hálftíma. Enda var eins gott að ég tók ekki fastar á honum. Flugan var í kjaftvikinu og hékk þar bara á tægju. Um leið og við háfuðum hann datt flugan úr honum.“

Betra en öll páskaegg sem i boði eru, sagði Páll Ágúst. Ljósmynd/Aðsend

Og þvílíkur fiskur. 85 sentímetra urriði og nánast hnöttóttur. Mældist ummál hans 55 sentímetrar og lætur þetta nærri því að vera 17 punda fiskur.

„Ég ætla bara að vona að maður sé ekki búinn að jinxa sumarið með svona byrjun,“ hló Páll. „En ég get sagt þér að þessi urriði var betri en öll páskaegg.“

96 sentímetra fiskur úr Geirlandsá

Þeir gerast ekki mikið stærri sjóbirtingarnir en sá sem Gunnar Óskarsson formaður SVFK landaði í Geirlandsá í opnunarhollinu. Hann mældist 96 sentímetrar. Þá veiddust tveir aðrir sem náðu 90 sentímetrunum og töluvert af fiski sem var yfir 80 sentímetrar. Vötn og veiði greindi frá opnunarhollinu í Geirlandsá.

• Blogga um frétt

Seinustu hundraðkallar sumarsins