Veisla og bingó í Köldukvísl

Kaldakvísl á Holtamannaafrétti, sem fellur í Sporðöldulón, er án efa eitt allra besta bleikjusvæði á Íslandi þegar kemur að staðbundinni bleikju. Þrír veiðimenn settu í gær í þrjátíu bleikjur í Ósnum sem er neðsti veiðistaður árinnar. Þeir lönduðu um tuttugu bleikjum og misstu slatta eins og Árni Kristinn Skúlason orðaði það í samtali við Sporðaköst. Með honum í för voru þeir Benedikt Þorgeirsson og Auke van der Ploeg. Benedikt lýsti deginum á Facebook-síðu sinni með þessum orðum: „Veisla í Köldukvísl.“

Árni Kristinn Skúlason með eina af mörgum fjallableikjum sem tóku púpur þeirra félaga. Ljósmynd/Aðsend

„Þetta var bara algert bingó. Við settum eiginlega strax í fisk og við komum og þetta var nánast stöðugt. Við byrjuðum að veiða um hádegi og tókum eina góða pásu og hættum um fimmleytið,“ sagði Árni Kristinn. Þeir voru að setja í þessa fiska frá Tjaldkvísl og niður undir klettavegginn í Ósnum þar sem Kaldakvísl hverfur inn í Sporðöldulón Landsvirkjunar.

Eins og fyrri ár eru það púpur hvers konar sem bleikjan er að taka þarna. Afar hentugt er að veiða þarna andstreymis og með tökuvara. hægt er að veiða á báðar hendur þegar komið er út í ána. 

Auke van der Ploeg tilbúinn að sleppa bleikju. Enn er nokkur snjór þar efra og slóðar ófærir við Köldukvísl. Ljósmynd/Aðsend

Slóðar eru ófærir eða illfærir og þurfa menn að búa sig undir að labba ef leita á annarra veiðistaða, eins og bara upp í Beygju eða enn ofar.

Nýuppgert veiðihús er við Köldukvísl og var ætlunin að hafa þar veitingaþjónustu en vegna Covid-19 var hætt við það, alla vega framan af sumri og eldar fólk sjálft og þrífur eftir sig.

Þeir félagar sendu frá sér efni á Instagram af þessari ferð og er hægt að nálgast það hér.

Hooked_iceland - Auke Van der Ploeg

Highlandtroutfishing - Benedikt Þorgeirsson

Icelandic_troutbum - Árni Kristinn Skúlason

• Blogga um frétt

Seinustu hundraðkallar sumarsins