Tilraunin í Andakílsá lofar góðu um framhaldið

Lax er genginn í Andakílsá í Borgarfirði. Tilraunaveiðar sem hafnar voru sl. miðvikudag lofa góðu um framtíðina og formaður veiðifélagsins vonast til að hægt verði að hefja sölu á veiðileyfum á ný á næsta ári. Veiðar hafa legið niðri í þrjú ár, frá því aur barst niður í ána úr lóni Andakílsárvirkjunar og lagðist yfir hylji og uppeldissvæði laxins.

„Þetta gekk þolanlega,“ sagði Birgir Guðnason frá Akranesi og dró heldur úr árangrinum. Hann hefur tekið ástfóstri við Andakílsá enda veitt þar í 60 ár. Hóf þar sinn veiðiskap með föður sínum, Guðna Eyjólfssyni, sem löngu síðar veiddi þar sinn síðasta lax, 95 ára gamall.

Stjórn Veiðifélags Andakílsár hefur fengið reynda veiðimenn úr Andakílsá til að annast tilraunaveiðarnar.

Ljóst er að lax er kominn í ána því Birgir og tengdasonur hans, Hilmar Magnússon, veiddu tólf laxa á eina stöng á morgunvaktinni í gær. Tók Birgir fram að þetta segði ekki alla söguna því þetta væri aðeins annar dagurinn sem veitt er í ánni í sumar, að því er fram kemur í umfjöllun um veiðina í Andakílsá í Morgunblaðinu í dag.

Seinustu hundraðkallar sumarsins