Tilviljanir í laxveiði geta verið merkilegar og jafnvel stórmerkilegar. Það er í það minnsta hægt að flokka fiskinn hans Chris Warne, sem hann veiddi í Laxá á Ásum í þann flokk. Chris var ásamt leiðsögumanninum sínum Jóni Aðalsteini Sæbjörnssyni, eða Alla eins og hann er kallaður, að veiða Krókhyl í gær. Flugan sem varð fyrir valinu var Green But númer 14.

Eftir nokkur köst tók stærðar fiskur hjá Chris. Eftir langa baráttu landaði hann ásamt Alla leiðsögumanni 102 sentímetra hrygnu, sem er stærsti lax sumarsins úr Ásunum til þessa.

Það sem gerir þessa viðureign enn merkilegri er sú staðreynd að eiginkona Chris var með honum þegar hann veiddi hrygnuna.

Chris Warne með hrygnuna sem hann veiddi í gær í sama hyl og frúin fyrir þremur árum. Þetta er hrygna sem mældist 102 sentímetrar og tók í Krókshyl. Auðvitað var sami leiðsögumaður. Hann Alli. Ljósmynd/JAS

Fyrir þremur árum, þann 9. ágúst voru þau hjónin einmitt stödd í Krókhyl með Alla leiðsögumanni. Donna Warne setti þá undir litla Sunray og viti menn, bolta fiskur negldi fluguna fljótlega. Eftir snarpa viðureign var landað 102 sentímetra hæng.

Þau hjónin hafa sem sagt bæði landað laxi af gagnstæðu kyni, sem mældist 102 sentímetrar og það í sama hyl, með þriggja ára millibili, næstum upp á dag. Alli leiðsögumaður var afar ánægður fyrir hönd þeirra hjóna og minnist ekki slíkrar tilviljunar í laxveiði áður og er hann maður sem hefur séð allt í þessum geira. Alli var leiðsögumaður þeirra í bæði skiptin.

Tengdar fréttir

Hundraðkallar

Einn sá stærsti sem veiðst hefur í sumar

• Nú raðast þeir inn stórlaxarnir
• „Það er komin náttúra í kallana“
• Þeir allra stærstu úr Haukadalsá
• Sá stærsti á Vesturlandi í sumar

» Fleiri tengdar fréttir

• Blogga um frétt

Seinustu hundraðkallar sumarsins