Haraldur hárfagri með maríulax á Íslandi

Finnski leikarinn Peter Franzen hefur leikið Harald hárfagra Noregskonung í vinsælu Netflix seríunum The Vikings. Nú er Peter staddur á Íslandi við laxveiðar í Miðfjarðará. Hann setti í og landaði sínum fyrsta laxi skömmu fyrir hádegi. Það var 67 sentímetra fiskur sem tók fluguna Haug númer átján. 

„Þetta var algerlega fáránlega magnað,“ sagði leikarinn í samtali við Sporðaköst. „Ég er aldrei að fara aftur að veiða geddu. Nú er það bara lax,“ sagði Haraldur hárfagri eftir að laxinum hafði verið landað, myndað og sleppt.

Leiðsögumaður Peters er Gary Champion og má segja að hann hafi staðið undir eftirnafninu.

Peter Franzen eða Haraldur hárfagri úr Vikingsþáttunum með maríulaxinn sinn. Honum við hlið er Jasper Paakkonen sem lék bróðir hans, Hálfdán svarta. Ljósmynd/Friðrik Þór Halldórsson

Veiðifélagi Peters er Jasper Paakkonen sem einnig er finnskur leikari og lék líka í The Vikings. Jasper lék bróðir Haralds hárfagra eða Hálfdán svarta. Þeir eru miklir félagar leikararnir og skemmtu þeir sé vel þegar Sporðaköst kíktu á þá á bakkanum.

Þetta er að öllum líkindum í fyrsta skipti sem Haraldur hárfagri kemur til Íslands og má segja að tími hafa verið kominn til. Haft er fyrir satt að einmitt hinn raunverulegi Haraldur fyrsti Noregskonungur og valdabrölt hans hafi leitt til þess að Ísland byggðist. Var ekki annað að heyra á konungnum að honum þykir vel hafa til tekist.

• Blogga um frétt

Seinustu hundraðkallar sumarsins