Fimm maríulaxar í kvennaholli í Svartá

Veiðikonurnar sem voru í tveggja daga holli í Svartá gerðu góða ferð. Samtals var ellefu löxum landað og þar af voru hvorki fleiri né færri en fimm maríulaxar. Þá missti kvennahollið þó nokkra laxa. 

Sérstaka athygli vekur að enginn þessara laxa veiddist í ármótum, heldur voru þeir allir veiddir ofar í ánni.

Svartá er nú komin yfir hundrað laxa og er það mikill viðsnúningur frá því í fyrra, þegar einungis veiddust 57 laxar allt árið.

Svartá er að njóta góðs af breyttum veiðireglum í Blöndu, en Svartá rennur einmitt í hana. Eftir að maðkur var bannaður í Blöndu og sett sleppiskylda og kvóti þá hafa ríflega þúsund laxar gengið upp fyrir teljara í Blöndu. Eitthvað af því er Svartárlax eins og gefur að skilja.

Hvorki fleiri né færri en fimm maríulaxar komu í þessu tveggja daga holli. Það er vel gert. Ljósmynd/Aðsend

Unnendur Svartár glöddust enda margir þegar breytingin var gerð. Veiði í ánni hefur sveiflast mikið. Minnst var árið 1977 þegar veiddust 46 laxar en hæst fór þessi þriggja stanga laxveiðiá í 619 laxa árið 1988.

En það var glaður hópur kvenna sem kvaddi Svartá eftir 2ja daga veiði með ellefu laxa bókaða.

• Blogga um frétt

Seinustu hundraðkallar sumarsins