Ragga með maríulaxinn á bomber

Leikkonan og sunddrottningin Ragnheiður Ragnarsdóttir veiddi maríulaxinn sinn í Miðfjarðará í gær. Hún er ein af stærstu stjörnunum í hinni vinsælu Netflixseríu The Vikings. Ragga eins og hún er kölluð var við veiðar ásamt nokkrum af samleikurum sínum í sjónvarpsseríunni.

Bomberinn sem Ragga veiddi maríulaxinn á. Ljósmynd/FÞH

Hún hefur ekki áður kastað fyrir lax en með dyggri aðstoð leiðsögumannsins Gary Champion setti hún í og landaði 64 sentímetra laxi.

Ragga fékk fiskinn á bomber sem eru stórar flugur sem fljóta á yfirborðinu og var takan því bæði mjög sýnileg og getur verið ofsafengin.

„Þetta var hrikalega skemmtilegt,“ sagði Ragga í samtali við Sporðaköst eftir að hafa landað maríulaxinum. „Auðvitað var ég stressuð og spennt en ég held að ég sé komin með veiðidellu,“ hló leikkonan.

Alsæl leikkona með maríulaxinn sinn. Ljósmynd/FÞH

Síðasti hluti The Vikings, eða tíu þættir eru enn óbirtir og býst Ragga við að þeir þættir fari í sýningu seint á þessu ári. Hún leikur stórt hlutverk í þáttunum sem Gunnhildur.

„Það var svakalega gaman að hitta þá Peter og Jasper, sem báðir léku með mér í þáttunum.“ Ragga má ekki tjá sig um innihald þeirra þátta sem eftir er að birta. Hún brosir bara þegar hún er spurð hvort hún verði í öllum síðustu tíu þáttunum.

Bomber flugur hafa verið að gefa ágætlega í Miðfirðinum síðustu daga.

• Blogga um frétt

Seinustu hundraðkallar sumarsins