Einn maður með 20% af veiði í Dölum

Arnór Ísfjörð Guðmundsson hefur landað 85 löxum í Laxá í Dölum í sumar. Heildarveiðin er samkvæmt vef Landssambands veiðifélaga 386 laxar. Það lætur nærri að Arnór sé með fjórðung af allri veiðinni í Dölunum í sumar.

„Já, þetta passar. Ég er að vonast til að ná þeim fimmtán sem mig vantar í hundraðið,“ sagði kátur veiðimaður í samtali við Sporðaköst. „Ég ligg á bæn og vona að eitthvað losni, að einhverjir hætti við svo ég geti náð þessu markmiði. Auðvitað er þetta heppni en kannski er veiðigyðjan að bæta mér upp að ég missti af veiðitúr til Alaska og Noregs út af Covid.“

Fjörutíu af þessum löxum sem Arnór hefur veitt hafa tekið lítinn Sunray Shadow með kón. Tuttugu hafa komið á Green But-míkrókón. Þá hafa tólf tekið Collie Dog-míkrókón og rest er á Hairy Mary númer 14 og Rauða Frances.

Eins og lesendur Sporðakasta væntanlega muna hefur Arnór landað tveimur hundraðköllum úr Dölunum og var það í sitthvoru hollinu en samt á sömu blaðsíðu í veiðibókinni.

„Þetta er búið að vera stórkostlegt sumar og ég var að leika mér að tölum. Tvisvar sinnum hundraðkall og hundrað laxar. Það gerir samtals þrjú hundruð og það er nýja póstnúmerið mitt,“ hló Arnór.

• Blogga um frétt

Seinustu hundraðkallar sumarsins