Eltingar og fjör í Vopnafirði - myndband

Bræðurnir Friðrik og Garðar Kristjánssynir, frá Hellissandi gerðu góða ferð í Vopnafjörðinn í síðustu viku. Fyrst veiddu þeir Hofsá og lönduðu þar sjö löxum og svo lá leiðin yfir í Selá, þar sem tólf fiskar komu á land.

Tölurnar yfir landaða fiska segja hins vegar engan veginn alla söguna af veiðinni. Þeir sendu Sporðaköstum nokkur myndbönd af eltingum og tökum. Þetta eru myndir teknar upp á síma en sína greinilega þau augnablik sem allir eru að leita að. 

Hér er Friðrik Kristjánsson með 76 sentímetra fisk úr Kleifarneshyl úr Hofsá. Ljósmynd/Garðar Kristjánsson

Fyrst eru tvö stutt myndbrot af stórlaxi að stríða þeim bræðrum í Fossi 2 í Hofsá. Þá kemur að Selá og þar er annars vegar myndbrot úr þeim magnaða veiðistað Bjarnarhyl í Selá, á svæði þrjú. Hylurinn er pakkaður af laxi og hefur gefið frábæra veiði í sumar. Síðasta myndbrotið er úr Efri Fossi í Selá þar sem Klaus Frimor veiðigúrú er leiðsögumaður þeirra bræðra. 

Garðar Kristjánsson landaði þessum áttatíu sentímetra fiski í Netahyl í Hofsá. Ljósmynd/Friðrik Kristjánsson

Þeir bræður eru sjómenn, skipstjóri og stýrimaður og auðvitað þegar menn taka sér hlé frá veiði í sjó liggur ekkert annað fyrir en að fara í ferskvatn.

• Blogga um frétt

Seinustu hundraðkallar sumarsins