Laxatorfurnar í Dölunum eru magnaðar

Það er mikið af laxi í Laxá í Dölum en hann er ekki mjög tökuglaður í því sumarveðri sem þar hefur verið. Áin er mjög vatnslítil og fiskurinn bunkar sig saman. Það er ljóst að rigningar munu breyta þessu ástandi og einhverjir veiðimenn eiga eftir að lenda þarna í bingói.

Dönustaðagrjót. Hér er mikið af fiski þó svo að erfitt hafi verið að fá hann til að taka í þessari glæru sem verið hefur. Ljósmynd/ Jón Þór

Jón Þór Júlíusson, einn af aðstandendum Hreggnasa ehf sem er með Dalina á leigu tók þessar myndir fyrir skemmstu og sé greinilega hversu þykk og mikil laxatorfan er neðarlega í Kristnipolli. Þetta er einn af lykilstöðum árinnar og geymir hann ávallt mikið magn af fiski. Þetta er þó bara neðri hlutinn og oft er enn meira af fiski ofar í veiðistaðnum.

Kristnipollur í aðeins meiri hæð. Efst á myndinni má greina huta af laxatorfunni sem er ofar í hylnum. Ljósmynd/Jón Þór

Hinn veiðistaðurinn er Dönustaðagrjót þar sem einnig er mikið af fiski og þessar ljósmyndir Jóns sýna svo ekki verður um villst að það er nóg af honum. Það er hins vegar nauðsynlegt að fá meira vatn og þá gerast ævintýri eins og svo oft í Dölunum síðsumars.

• Blogga um frétt

Seinustu hundraðkallar sumarsins