Veiði | mbl | 12.9.2020 | 9:16 | Uppfært 12:43

Bestu haustflugurnar III

Höskuldur með eina af mörgum hausthrygnum sem hafa fallið fyrir Flúðinni. Ljósmynd/Aðsend

Við höldum áfram að leita í smiðju reyndra veiðimanna um bestu haustflugurnar. Nú er komið að Höskuldi B. Erlingssyni, leiðsögumanni og lögregluþjóni. Hann hefur verið í leiðsögn í Víðidalsá, Laxá á Ásum og víðar.

„Flúðin er búin að gefa mér stóra laxa í september og merkilegt nokk; flestir voru hrygnur,“ sagði Höskuldur í samtali við Sporðaköst.

Myndin sem fylgir fréttinni er einmitt af Höskuldi með hrygnu sem tók Flúðina í Víðidalsá. „Hún tók í björtu neðst í Silungabakka, en var landað við bílljós í Faxabakka 40 mínútum síðar. Flúðin fluga hefur reynst mér gríðarlega vel síðsumars.“

Annar reynslubolti er Björn K. Rúnarsson í Vatnsdal. „Á haustin myndi ég velja Blue Sapphire í stærð tólf. Mjög traust fluga sem hefur skilað mér mörgum fúlum hængum síðsumars. Svo ef hún klikkar þá er gott að eiga Munroe Killer númer fjórtán i boxinu, svona til vara. Sú bláa hefur gefið mér laxa í Nesi, Vatnsdal og Víðidal bæði á reki og strippuð.“

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.