Veiði | mbl | 27.9.2020 | 8:37

Síðustu forvöð að skila inn veiðimyndum

Óskar Hængur með 75 sentímetra hæng í Svalbarðsá í sumar. Ljósmynd/GÁ

Nú eru að verða síðustu forvöð að skila inn veiðimyndum í samkeppni mbl.is, Veiðihornsins og Sporðakasta um bestu veiðimyndir sumarsins. Skilafrestur rennur út 1. október. Nú er tíminn til að fara í gegnum myndir sumarsins og deila skemmtilegum eða fróðlegum augnablikum með öðrum veiðimönnum.

Hér eru nokkur skemmtileg dæmi um myndir sem nýlega voru sendar inn. Fyrsta myndin er af honum Óskari Hæng Gíslasyni með 75 sentímetra lax í Svalbarðsselshyl í Svalbarðsá. Óskar er ellefu ára og ljóst að hann verður öflugur veiðimaður, og er það reyndar nú þegar.

Helga Dís með glæsilegan lax af Hrafnaklettum í Eystri Rangá. ljósmynd/RS

Næst er það ung stúlka. Helga Dís Reynisdóttir með maríulaxinn sinn úr Eystri Rangá og hann var veiddur í veiðistaðnum Hrafnaklettum. Pabbi hennar tók myndina en hann er Reynir Sigmundsson leiðsögumaður í Eystri.

Hrannar Ingi með bleikju úr Ljótapolli. Ljósmynd/TT

Þá er það mynd af hálendinu. Hrannar Ingi með bleikju sem veidd var í Ljótapolli. Myndasmiður er Tinna Torfadóttir.

Loftfimleikar í Varmá við Hveragerði. 66 sentímetra sjóbirtingur í loftköstum. Ljósmynd/KMB

Veiðimaður er Finnur Már Eyþórsson og myndatökumaður er Knútur Magnús Björnsson. Hér er 66 sentímetra sjóbirtingur að sýna loftfimleika í Varma við Hveragerði. Myndin er tekin 17. september.

Í sumar veitum við verðlaun fyrir fjóra flokka mynda. Þeir eru eftirfarandi: Ungir veiðimenn, Veiðikonur, Stórir fiskar og loks Veiðimynd ársins.

Vegleg verðlaun verða veitt í hverjum flokki:

Ungir veiðimenn – Redington-krakkafluguveiðipakki.

Veiðikonur – Simms G3 Guide Gore-tex-dömuveiðijakki.

Stórir fiskar – Mclean-háfur með innbyggðri vigt.

Veiðimynd ársins – Sage Igniter-einhenda.

Allar myndir sem sendar eru til þátttöku eru gjaldgengar og mun dómnefnd skipuð reynsluboltum, bæði í veiði og ljósmyndun, fara yfir og meta hvern flokk fyrir sig.

Þær myndir sem sendar eru inn er heimilt að birta í árlegu riti Veiðihornsins, Veiði 2021 og/eða öðrum auglýsingum Veiðihornsins. Með því að senda mynd samþykkir ljósmyndari slíka notkun á henni.

Senda skal myndirnar í góðri upplausn á netfangið eggertskula@mbl.is. Greina skal frá hvar myndin er tekin og hvað var að gerast. Þá er nauðsynlegt að fá nöfn þeirra sem eru á myndinni og ekki síst hver tók hana, því það er sá sem hlýtur verðlaunin ef vel tekst til.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.