Lokahollið í Stóru-Laxá er nú að veiðum. Þessi tími í ánni er ótrúlega spennandi og ef vatnsmagn er gott er laxinn genginn upp af Iðu í Stóru-Laxá. Friðjón Mar Sveinbjörnsson eigandi og rekstraraðili í Veiðiflugum á Langholtsvegi er einn af þeim sem veiða lokahollið.

„Ég fór niður í Kóngsbakka og setti undir lítinn Bismó, svona Rögga grænan. Ég var búinn að vinna mig niður staðinn og var farinn að hugsa hvað ég væri að gera með þetta smápöddudrasl, þegar hann allt í einu kom upp og negldi Bismóinn,“ sagði Friðjón í samtali við Sporðaköst.

Hann áttaði sig fljótlega á að þetta var fiskur í yfirstærð og hann missti hann niður úr hylnum. Stóra-Laxá var í miklu vatni og hvergi væð. Fiskurinn æddi niður og það var ekki fyrr en á næsta veiðistað sem Friðjón hafði betur eftir ríflega hálfan kílómetra af hlaupum. Laxinn var háfaður og þar var að verki Sigmundur Sigurðsson. Friðjón sagði honum að koma sér fyrir og hann myndi renna laxinum í háfinn. Þá voru þeir komnir niður í Stekkjarnef. Það gekk eftir og skyndilega hrópaði Sigmundur: „Hann er kominn í,“ eftir að Friðjón hafði stýrt honum í háfinn.

Höfðingjanum sleppt á nýjan leik. Stirtlan er þykk og oft er það besta merkið um alvöru stórlax þegar veiðimaður nær ekki utan um hana. Ljósmynd/Aðsend

Fiskurinn var mældur og stendur vel 101 sentímetra. Þar með er þetta stærsti lax veiddur í Stóru-Laxá í sumar. Friðjón, sem er jafnvel betur þekktur sem Friðbert í Furðuflugum, var afskaplega ánægður með þessa niðurstöðu. „Ég er búinn að vera að veiða víða í sumar og þetta er fyrsti sem er yfir níutíu sentímetra,“ hló hann.

Mælingin. Hann stóð 101 sentímeter og er sá stærsti sem Stóra Laxá hefur gefið í sumar. Ljósmynd/Aðsend

Stóra-Laxá er mjög vatnsmikil eftir gríðarlegar rigningar síðustu daga. Stóra er þekkt fyrir góða septemberspretti. Hún var í síðustu vikutölum á angling.is komin í 387 laxa. Í fyrra var hún samtals með 480 fiska þannig að ljóst er að hún nær því ekki. Stefnir árið í ár í að vera eitt af lakari árum í Stóru í langan tíma og þarf að fara aftur til 2007 til finna minni veiði, en þá veiddust 238 laxar í henni. Sveiflurnar eru miklar og má nefna til samanburðar að árið 2013 gaf hún 1.776 laxa.

UPPFÆRT

Hér sést greinilega að málbandið er á réttum stað. Þetta er stækkuð mynd úr mynd sem er ofar á síðunni. Ljósmynd/Aðsend

Nokkrir nærsýnir einstaklingar höfðu samband við Sporðaköst og töldu mælinguna á fiskinum sem Friðjón Mar landaði í gær ekki vera rétta. Sporðaköst höfðu samband við Friðjón og báðu um stækkun á myndinni sem hann tók og staðfestir það rétta mælingu á fiskinum, sem mældist 101 sentímetri. Svo er bara spurning um að fá sér betri gleraugu.

Hér geta menn dæmt þetta betur. Mikið hefur verið um það í sumar að menn dragi mælingar í efa. Þessi mynd er klár staðfesting. Ljósmynd/Aðsend

Tengdar fréttir

Hundraðkallar

Einn sá stærsti sem veiðst hefur í sumar

• Nú raðast þeir inn stórlaxarnir
• „Það er komin náttúra í kallana“
• Þeir allra stærstu úr Haukadalsá
• Sá stærsti á Vesturlandi í sumar

» Fleiri tengdar fréttir

• Blogga um frétt

Seinustu hundraðkallar sumarsins