Gott útlit fyrir fyrstu veiðidagana

Mildur vetur sunnanlands og hlýr marsmánuður eykur enn á eftirvæntingu vorveiðimanna sem hefja nýtt tímabil á skírdag, 1. apríl. Jón Hrafn Karlsson, landeigandi við Eldvatn í Meðallandi, segir líklegt að meiri hreyfing sé komin á fiskinn, eftir hlýindakafla að undanförnu.

Nú er hérna átta gráðu hiti og sól og gengur hratt á þann snjó sem kom um daginn. „Það er von á kuldakasti um páskahelgina en mér sýnist líta út fyrir að við náum fyrstu tveimur dögunum góðum. Að vísu spáir vestanátt, en sennilega kemur það ekki að sök svona í blábyrjun. Þessi vetur hefur farið betur með fiska og menn en sá síðasti. Þegar við opnuðum í fyrra var enn grimmdarvetur og hafði verið það um langa hríð. Nú er töluvert annað útlit á þessu,“ sagði Jón Hrafn í samtali við Sporðaköst.

Í næsta nágrenni er staðan sambærileg og því ljóst að veiðimenn sem halda til veiða í Tungufljóti, Tungulæk, Skaftá, Geirlandsá og fleiri sjóbirtingsstöðum geta átt von á ævintýrum fyrstu dagana, þar til frýs í lykkjum á laugardag.

Jón Hrafn hefur ekki orðið var við geldfisk í Eldvatni en segir það svo sem ekki að marka. Hann hefur aðallega verið að vinna mink í efri hluta árinnar. „Mér fannst það þó býsna magnað að menn voru að fá nýgengna geldfiska í janúar og febrúar í gegnum ís á Víkurflóðinu,“ sagði Jón Hrafn.

Ljóst er að vegna samkomutakmarkana þurfa veiðimenn að gera nokkrar ráðstafanir. Jón Hrafn segir að fleiri hús verði í boði þannig að tryggt sé að fjöldi veiðimanna fari ekki yfir þá tölu sem leyfileg er. „Við gættum vel að sóttvarnarreglum í fyrra og munum gera það með sama hætti nú.“

• Blogga um frétt

Seinustu hundraðkallar sumarsins