26 birtinga dagur í Kjósinni

Sjóbirtingsveiði er hafin í Laxá í Kjós. Í hlýindum gærdagsins gerðu nokkrar stangir hörkuveiði. Samtals var 26 birtingum landað og það á hefðbundnum stöðum eins og Káranesfljóti, Álabökkum, Mosabreiðu og Baulunesfljóti.

Einn þeirra sem var við veiðar í gær var Aron Sigurþórsson ásamt félaga sínum, Einari Hermannssyni. Þeir lönduðu níu birtingum á stöngina. Eins og oft er á þessum tíma voru fiskarnir í misjöfnu holdafari. Allt frá því að vera í góðum holdum yfir í það að vera skemmra á veg komnir.

Hver er ekki að bíða eftir þessari stöðu? Ljósmynd/EH

„Stærsti sem við lönduðum var 79 sentimetrar. Þessir fiskar voru bæði að taka straumflugur og púpur. Við vorum að fá á Black Ghost og Dýrbít. Í púpunum vorum við með Pheasant Tail, Squirmy og púpur sem ég hef hnýtt og heita svo sem ekkert,“ sagði Aron í samtali við Sporðaköst.

Einar Hermannsson á góðri stundu í gær með Kjósarbirting. Ljósmynd/AS

Laxá í Kjós er ein af þeim ám þar sem sjóbirtingurinn hefur verið að taka hressilega við sér og veiðistaðirnir sem nefndir eru hér að ofan eru klassískir sjóbirtingsstaðir í Laxá.

Nýr leigutaki hefur tekið við Laxá í Kjós en það er Haraldur Eiríksson. Áður var Hreggnasi ehf. með Kjósina á leigu.

• Blogga um frétt

Seinustu hundraðkallar sumarsins