„Tók eftir fimm sekúndur“

„Þetta tók ekki langan tíma. Hann tók eftir fimm sekúndur,“ sagði Stefán Sig­urðsson, lukkulegur eftir að hafa landað fyrsta laxi sumarsins í morgun, 77 cm, þykkum nýrenningi við Urriðafoss í Þjórsá. 

Stefán Sig­urðsson hjá Iceland Outfitters er leigutaki svæðis­ins við Urriðafoss, hann renndi maðkinum út í strenginn á mínútunni klukkan átta og þremur mínútum síðar var laxinn í háfnum.

Harpa Hlín Þórðardóttir, sem einnig er leigutaki svæðisins, náði skömmu síðar 93 sentímetra hæng. Fisknum var sleppt að lokinni myndatöku.

Harpa Hlín Þórðardóttir með 93 cm hæng sem hún veiddi í Þjórsá í morgun. Ljósmynd/Stefán Sigurðsson

Náði ekki einu sinni að reima skóna

 „Ég náði ekki einu sinni að reima á mig skóna,“ sagði félagi hans sem háfaði laxinn.

„Þetta er geggjaður fiskur, spikfeitur og vel fram genginn,“ sagði Ein­ar Har­alds­son bóndi á Urriðafossi sem fylgdist kátur með. Einar spáir góðri veiði í sumar og stórlaxa-sumri.

Veitt er á tvær stangir á svæðinu sem Iceland Outfitters er með á leigu. Veiðin hófst klukkan átta eins og áður sagði og tók aðeins fimm sekúndur að fá fyrsta laxinn. Mikill hugur er í veiðimönnum enda mikið af fiski í ánni. Mikill beljandi er í Urriðafossi og hann vatnsmikill.

Stangveiði við Urriðafoss hófst sumarið 2017 og hefur frá fyrsta degi notið mikilla vinsælda. Hefur netum síðan verið fækkað við jarðir í ánni og veiðar á stöng teknar upp á sífellt fleiri svæðum. 

• Blogga um frétt

Seinustu hundraðkallar sumarsins