Stefna að því að tífalda hlutfall kvenna

FUSS, félag ungra í skot- og stangveiði stóð fyrir stelpuferð í Þingvallavatn í vikunni. Það var Helga Kristín Tryggvadóttir stjórnarmaður í félaginu sem leiddi hópinn. Hún sagði í samtali við Sporðaköst að mikil ánægja hefði verið með ferðina. Veiðin var líka virkilega góð, en 36 fiskum var landað. 34 urriðar og tvær bleikjur. Þar fyrir utan voru nítján fiskar misstir.

Sylvía Ösp Símonardóttir landaði þessari fallegu bleikju. Ljósmynd/HKT

„Við efndum til ferðarinnar í þeirri viðleitni að auka hlut kvenna í félaginu hjá okkur. Núna eru einungis tvö prósent félagsmanna konur en við stefnum að því að koma því hlutfalli upp í tuttugu prósent í árslok,“ sagði Helga Kristín.

Hafrún Tryggvadóttir með einn af 34 urriðum sem hópurinn landaði. Ljósmynd/HKT

Flestar sem tóku þátt í ferðinni eru byrjendur og voru að landa sínum fyrstu fiskum á flugu. Ferðin var nýtt til að uppfræða um silungsveiði almennt og var farið yfir flugur og tauma og fleiri grunnatriði í veiði.

Þessar tóku þátt í stelpuferð FUSS í Þingvallavatn. Mikil hámingja og enn meiri áhugi. Ljósmynd/FUSS

„Það mátti alveg heyra á stelpunum að þeim hefði þótt veiðin frekar fráhrindandi þar sem strákar eru í svo miklum meirihluta og erfitt að byrja. Flestar eiga þær pabba sem græjaði allt fyrir þær fyrir ferðina. Við vorum sammála um að hvetja feður til að hafa þolinmæði og kenna börnunum sínum frá upphafi,“ sagði Helga Kristín þegar hún var spurð hvaða tónn hefði verið í umræðum um veiði í hópnum.

Þær gistu í veiðihúsinu Ásgarði, sem er í eigu Lax-á og veiddu tvo daga á ION svæðinu í Þingvallavatni.

„Yndisleg ferð, mikil hamingja og áhuginn gríðarlegur,“ sagði Helga Kristín að lokum.

• Blogga um frétt

Seinustu hundraðkallar sumarsins