Brauðterta og banastuð í Laxá

Gleðin hefur verið við völd í Laxá í Dölum á opnunardegi. Fyrri vaktin gaf þrjá laxa og einn var misstur. Eins og sjá mátti á Sporðaköstum fyrr í dag var dagurinn dansaður í gang strax klukkan sjö í morgun.

Fyrstu laxarnir veiddust í Lambastaðakvörn upp úr klukkan tíu í morgun. Þar lönduðu Harpa Hlín Þórðardóttir og Stefán Sigurðsson fyrstu þremur löxunum og misstu þann fjórða. Þessir laxar tóku allir Sunray á strippi.

Fjör í Lambastaðakvörn klukkan tíu í morgun. Fyrsti Dalalaxinn kominn á land. Ljósmynd/HHÞ

„Félagar okkar sáu fiska í morgun í Neðri–Kistu og í Mjóhyl. Við erum þar núna og höfum ekki orðið vör við fisk. En þetta er búið að vera frábært. Þegar við komum í hús beið okkar hin árlega brauðterta sem Sara Pétursdóttir gerir svo snilldarlega. Stebbi kallar hana Majonesdrottninguna. Nú er það svo að margir eiga erfitt með svefn út af spenningi áður en þeir fara í veiði. Stebbi sefur ekki út af spenningi að komast í brauðtertuna,“ sagði Harpa í samtali við Sporðaköst.

Harpa með lax númer tvö. Þessi tók Sunray og líka í Lambastaðakvörn. Ljósmynd/SS

Það er í sjálfu sér ágætt að fá þrjá laxa á fyrstu vakt miðað við það sem hefur verið að gerast í opnunum. Laxá er í ágætu vatni og það er stærsti straumur á þessum sólarhring. Verður fróðlegt að sjá hverju það skilar.

• Blogga um frétt

Seinustu hundraðkallar sumarsins