Sumir laxar eru bara flottari en aðrir

Sumir laxar eru einfaldlega stórglæsilegir. Myndin sem fylgir þessari frétt er af hrygnu sem veiddist í síðasta holli í Víðidalsá og það verður að segjast eins og er að þetta eintak er fullkomið. Þessi 93 sentímetra hrygna veiddist í Dalsárósi, sem er einn frægasti veiðistaður Víðidalsár.

Björn Halldór Helgason veiddi þennan lax. Hann sagði í samtali við Sporðaköst að viðureignin hefði staðið í um 20 mínútur. „Hann tók Sunray, svona tommu langan með gulu ívafi. Ég vissi strax að þetta væri stór lax, en ég fékk einmitt maríulaxinn minn í Víðidalsá sumarið 2016. Það var hundrað sentímetra hængur sem ég veiddi í Harðeyrarstreng á þessum sama tíma,“ sagði Björn sem var býsna sáttur við laxinn úr Dalsárósi.

Veiðin í Víðidalsá hefur verið róleg eins og í öðru ám á Vestanverðu landinu og raunar öllum ám, nema Þjórsá. En við birtum þessa mynd til að gleðjast yfir þessu glæsilega eintaki. Sumir laxar eru einfaldlega flottari en aðrir.

• Blogga um frétt

Seinustu hundraðkallar sumarsins