Veiði | mbl | 2.7.2021 | 14:54 | Uppfært 15:21

Stóra-Laxá státar af bestu opnuninni

Baldur Magnússon, betur þekktur sem "Muraren" tekst á við lax í opnun í Stóru. Samtals veiddust 27 laxar sem er ein besta opnun sem menn muna eftir á svæði I og II. Ljósmynd/SMG

Stóra-Laxá í Hreppum státar af bestu opnun laxveiðiáa í sumar. Opnun á svæði fjögur og eitt og tvö skilaði samtals 45 löxum í bók. Harðsvírað veiðigengi opnaði þessi svæði með Árna Baldursson leigutaka í broddi fylkingar.

Fyrst var svæði fjögur opnað, en það er efsta veiðisvæði árinnar. Samtals var þar landað átján löxum og voru smálaxar og lúsugir í bland.

Svæði I og II var opnað í beinu framhaldi og eftir tvo og hálfan dag, sem er lengd opnunarhollsins, var búið að landa 27 löxum. Fiskar fengust um allt svæðið og er þetta afar góð opnun í Stóru-Laxá. Í fyrra var opnunin á neðstu svæðunum með 25 laxa og þótti mjög gott.

Svæði III verður nú opnað í framhaldinu en það er tveggja stanga svæði og gefur iðulega fæsta laxa, en miðað við þessa stöðu er aldrei að vita hvað þriðja svæðið hefur að geyma.

Eins og væntanlega marga veiðimenn rekur minni til var stórlaxaveisla í lok tímabils í Stóru í fyrra og þessi veiði núna bendir til þess að fram undan geti verið áhugavert sumar í Hreppunum.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.