Stærsti lax sumarsins til þessa veiddist í Jöklu í morgun. Laxinn veiddist í á miðsvæði Jöklu í veiðistaðnum Sandárbroti. Það var Nils Folmer Jorgensen, stórlaxahvíslarinn, sem setti í og landaði þessum laxi.
Hann mældist 102 sentimetrar og er þriðji hundraðkallinn sem Sporðaköst vita um í sumar. Áður höfðu veiðst tveir laxar sem mældust 101 sentimetri og var það sama daginn í Laxá í Aðaldal og Eystri-Rangá.
Nils var að koma í fyrsta skipti í Jöklu síðan 2016. Áin hefur verið óveiðandi síðustu daga sökum leysinga og var hún algert kakó. Í gær veiddust fyrstu laxarnir, þegar sjatnaði loks í Jöklu.
„Í morgun var skyggnið í henni orðið mun betra. Ég var að leita að fiski og sé skyndilega mjög stóran lax í Sandárbroti. Hann var bara einn og hann varð var við mig svo hann synti í burtu. Ég ákvað að bíða og settist niður í tíu mínútur og þá kom hann aftur á staðinn þar sem ég sá hann fyrst. Ég kastaði túpunni Katli Mána á hann og það var eins og þetta væri sýnt hægt. Hann synti í rólegheitum á eftir túpunni og ég sá að hann opnaði munninn og gleypti hana. Það var magnað að sjá þetta svona vel,“ sagði Nils í samtali við Sporðaköst.
Sandárbrot er um 35 kílómetra leið fyrir laxinn. Það vakti athygli Nils að fiskurinn var lúsugur en að sama skapi var hann þreyttur. Bardaginn var stuttur og telur Nils það stafa af því að fiskurinn hefur á mjög stuttum tíma gengið þetta mikla fljót.
Ummál laxins var 54 sentimetrar. Þrír aðrir laxar hafa veiðst í Jöklu en Nils telur góðar horfur nú þegar vatn er sjatnandi.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |