Mikil umferð af laxi á ósasvæði Norðurár

Miklar áhyggjur hafa verið meðal veiðimanna að sumarið í sumar yrði enn eitt lélega veiðisumarið. Hins vegar eru jákvæð teikn á lofti. Sigurður Pétursson, einn af landeigendum Strauma, sem er hluti af ósasvæði Norðurár, var að ljúka þar veiðum í hádeginu. „Það hefur verið mikil umferð af laxi þessa tvo daga sem við höfum verið að veiða. Við höfum verið að sjá hann stökkva og stundum hafa verið tveir eða þrír á lofti í einu. Átta löxum hefur verið landað og þetta er þessi dæmigerði smálax,“ sagði Sigurður í samtali við Sporðaköst í morgun.

Þá hefur verið mikil sjóbirtingsveiði á svæðinu og hafði hann ásamt veiðifélögum landað um þrjátíu birtingum og sá stærsti var níu pund.

Þorsteinn tilbúinn með háfinn fyrir viðskiptavin. Þessi fór í netið. Þorsteinn segir að ástandið sé ólýsanlega miklu betra en síðustu ár. Ljósmynd/ÞS

Þorsteinn Stefánsson, yfirleiðsögumaður í Norðurá sagði stöðuna nú vera allt aðra en síðustu þrjú ár. „Þetta er miklu, miklu, miklu, bara ólýsanlega miklu betra en í fyrra. Við erum búnir að bíða í þrjú ár eftir svona alvöru besta tíma sumarsins og loksins er það komið. Við höfum í síðustu þremur hollum verið að skila hátt í áttatíu löxum á þremur dögum,“ sagði Þorsteinn í samtali við Sporðaköst.

Hann upplýsti að lúsugur fiskur hefði veiðst frammi á Dal í gær og þeir væru að sjá mikið af nýjum fiski. „Síðustu ár hefur þetta byrjað að dala hjá okkur á þessum tíma en nú er myndin allt önnur og það er bara stöðug ágæt veiði. Við erum ennþá á „prime“ tíma. Við höfum ekki fengið þessi risa holl upp á vel yfir hundrað laxa, en verið stöðugt í nokkurn tíma og lítur vel út með framhaldið.“

Þorsteinn segist mæta léttur og kátur í vinnuna. Það er gott vatn, töluvert af fiski og hann er að ganga. Ljósmynd/ÞS

Þorsteinn er að eina stöng í leiðsögn núna og er sá veiðimaður kominn með tíu laxa eftir tveggja daga veiði. Í hollinu á undan var hann með tvær stangir og þær lönduðu samtals nítján fiskum og misstu annað eins. Hollið þar á undan var hann með eina stöng og skilaði hún fjórtán löxum á þremur dögum.

„Eftir það sem hefur verið að gerast, sérstaklega síðustu tvö ár, þá er maður bara léttur og kátur í vinnunni. Þetta er bara loksins orðið eins og þetta á að vera,“ sagði Þorsteinn.

Svipaða sögu sögðu veiðimenn sem voru í Gljúfurá fyrir helgi. Skyndilega fóru þeir að sjá fiska vera á stöðum sem höfðu verið tómir og einnig fiska á dæmigerðum göngustöðum.

Veiðimenn sem voru að koma úr Víðidalsá og Vatnsdalsá sögðu töluvert vera af fiski í göngu í Víðidalsá en veðurskilyrði og lítið vatn hafa sett strik í reikninginn. En menn voru sammála um að staðan væri mun betri en síðustu tvö ár. 

Í Vatnadalsá hefur orðið var við mikið af laxi neðst í ánni en veðurskilyrði hafa verið afar óhagstæð. Fiskurinn veigrar sér við að ganga í gegnum Flóðið en áin oft farið í tuttugu stig í veðurblíðunni.

Sjá má á rafrænu veiðibókinni hjá Miðfjarðará að þar hefur verið stígandi í veiðinni og hafa síðustu dagar verið að skila þrettán til sextán löxum.

Það má því allavega ýta á pásu hvað varðar svartsýnina og vonandi er þetta ávísun á þokkalegt veiðisumar.

• Blogga um frétt

Seinustu hundraðkallar sumarsins