Veiði | mbl | 22.7.2021 | 7:34

Fljótaá komin í gírinn eftir leysingar

Brian O´Keeffe veiðimaður ásamt leiðsögumanni sínum Þorsteini Guðmundssyni með fallegan smálax úr Fljótaá. Ljósmynd/ÞG

Eftir erfitt vor og kalda sumarbyrjun er Fljótaá farin að gefa ágæta veiði. Framan af var kalt og svo fylgdu gríðarlegar leysingar. En nú horfa hlutir til betri vegar. Vigfús Orrason eða Vivvi sendi í gær skýrslu um stöðuna og Sporðaköst hafa fengið leyfi til að birta hana.

„Fljótaá var skítköld í júní enda minnti veðrið þá frekar á apríl. Bleikjan var farin að ganga upp í Miklavatn en fór ekki upp í á nema að mjög litlu leyti. Við vorum samt eitthvað að tína upp af bleikju þar til hitabylgjan skall á og gerði ána óveiðandi á stuttum tíma. Menn álpuðust reyndar í nokkrar bleikjur í kakóinu fyrir eitthvað sambland af þrjósku og slembilukku og settu meira að segja í nokkra laxa sem sluppu.

Gert klárt fyrir sleppingu í Bakkahyl. Ljósmynd/ÞG

Þegar áin fór að hreinsa sig og hlýna fór að veiðast. Bleikja fór að ganga upp úr Miklavatni og beint úr sjó og fyrsti laxinn kom á land 9. júlí og þá komu fjórir. Á hádegi 18. júlí var svo skráður 31 lax og um 550 silungar.

Fljótaá er enn býsna bólgin og geta viðureignir því orðið tvísýnari en við eðlilegri aðstæður. Ljósmynd/ÞG

Áin er nú komin í fínt form þótt hún sé enn bólgin og bæði lax og bleikja að ganga. Mest er það smálax en hann er stórglæsilegur, mest í kringum 65 sentímetra og vel haldinn.

Þessa vikuna er ástundun í ánni í léttari kantinum en ég spái því að þeir sem sinna munu veiðinni á næstunni eigi eftir að eiga góða daga.“

Svona hljóðar skýrslan sem Vigfús setti saman og birti í gær. Verður spennandi að fylgjast með Fljótaánni næstu daga og vikur.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.