Fyrstu laxarnir komnir úr Vatnsá

Fyrstu laxarnir veiddust í Vatnsá, sem fellur úr Heiðarvatni, skömmu eftir mánaðamót. Vatnsá er mikil síðsumarsá og er veitt í henni fram í október. Fyrstu þrjú hollin í sumar settu í laxa en lönduðu ekki. Þeim fyrsta var landað 3. ágúst og þann dag komu tveir á land.

„Slatti af laxi hefur sloppið og töluvert af birtingi hefur verið að veiðast og má búast við að straumurinn sem nú fer að koma skili inn fyrstu göngunum. Árið í fyrra var sérstakt fyrir það hve snemma laxinn gekk, en nú virðist allt vera eins og áður, þegar laxar byrjuðu að veiðast í meira mæli upp úr 10. ágúst og allt fór á flug í lok ágúst,“ sagði Ásgeir Arnar Ásmundsson í samtali við Sporðaköst. Ásgeir er umsjónaraðili með Vatnsá og Heiðarvatni.

Hann bendir á að á árunum 2004 til 2018 hafi síðasta vikan í ágúst til 10. september oft gefið um fjörutíu prósent af veiðinni og rest komið eftir það til loka veiðitímans. 

Dæmigerður veiðistaður í Vatnsá. Lítill og viðkvæmur. Fara þarf varlega við veiðar í henni til að draga úr líkum á að laxinn eða birtingurinn sjái veiðimanninn. Ljósmynd/ÁAÁ

„Það sem kemur kannski ekki á óvart í þessu er að birtingurinn er seinni í ár en oft áður og það skýrist líklega af mjög köldu vori. Birtingurinn gekk út fram í júlí og byrjaði að ganga aftur til baka í lok júlí. En það er bara rétt að byrja göngutímabilið í sjóbirtingnum og það gæti byrjað með næsta straumi sem væri þá hálfum mánuði seinna en í fyrra,“ sagði Ásgeir. 

Nýtt veiðihús er við Vatnsá og segir Ásgeir því hafa verið afar vel tekið af veiðimönnum.

• Blogga um frétt

Seinustu hundraðkallar sumarsins