Laxveiðin víðast hvar mjög róleg

Sömu rólegheit einkenna laxveiðina. Nýjar veiðitölur sem birtust í morgun á vef Landssambands veiðifélaga, angling.is, staðfesta þetta. Í efsta sæti er Eystri-Rangá með rúmlega 1.600 laxa. Vikuveiðin var um 300 laxar.

Heldur dró saman með Rangánum, þar sem vikuveiðin var tæplega 360 laxar. Nú hafa samtals 1.417 laxar verið færðir til bókar í Ytri-Rangá.

Einar Falur Ingólfsson ljósmyndari, með 86 sentímetra fisk úr Efri-Fossi í Hofsá í morgun. Ljósmynd/ÞJV

Norðurá heldur þriðja sæti þrátt fyrir að veiðin þar sé farin að róast. Samtals skilaði síðasta vika 120 löxum og er Norðurá komin í 1.125 laxa.

Miðfjarðará skilaði 170 laxa viku og er áin að detta í þúsund og væntanlega gerist það í dag eða á morgun. Heildartalan eftir síðustu viku er 989 laxar.

Þverá/Kjarrá er sömuleiðis að nálgast þúsund laxa múrinn. Þar vantar 43 laxa til að ná þeirri tölu. Samtals eru þær búnar að skila 957 löxum.

Magnús Viðar með 75 sentímetra úr Nesbreiðu og að sjálfsögðu líka úr Hofsá. Ljósmynd/Sólveig Skjaldardóttir

Urriðafoss er í sjötta sæti, en ekki voru komnar vikutölur þaðan fyrir síðustu viku. Staðan er 790 laxar.

Haffjarðará átti rólega viku með 36 laxa en er samtals komin með 624.

Í áttunda sæti er Langá með 523 laxa, svo kemur Laxá í Kjós með 511 og í tíunda sæti er Selá í Vopnafirði með 480.

Upplýsingar úr fleiri ám er hægt að sjá inni á angling.is.

• Blogga um frétt

Seinustu hundraðkallar sumarsins