Rigningin hleypti lífi í birtinginn

Aðstæður breyttust hratt og mikið í Tungufljóti í gær og í dag. Tveggja daga holl sem lauk veiðum á hádegi landaði samtals 24 fiskum og nánast allt af því var birtingur. Árni Kristinn Skúlason var einn af þeim sem var i hollinu og hann sagði flesta fiskana hafa veiðst undir Bjarnafossi, sem er efsti veiðistaðurinn í Tungufljóti.

Hafsteinn Már Sigurðsson með hörku birting sem tók púpu neðan við Bjarnafoss. Það ringdi hressilega á hollið og var það fagnaðarefni. Ljósmynd/ÁKS

„Við fórum víða og það var bara mikið af fiski. Svo fór að rigna hressilega og óx í ánni. Þá fór Bjarnafoss að gefa. Það var líka mikið af fiski í Syðri-Hólma,“ sagði Árni í samtali við Sporðaköst. Sjóbirtingurinn var vel haldinn og sá stærsti sem þeir lönduðu mældist 83 sentímetrar.

Flestir tóku þeir púpur, eins og þessi. Ljósmynd/ÁKS

Þeir félagar voru mest að taka birtinginn á púpur enda fáir þeim fremri í púpufræðum. Við vorum með frétt í morgun einmitt um Tungufljót þar sem talað var um rólega veiði og Kristján Páll Rafnsson sagði ljóst að mikið af fiski væri niðri við Syðri-Hólma og biði rigningar og þess að áin myndi vaxa. Þetta gekk eftir og þeir nutu góðs af veðrabreytingunni Árni og félagar.

Þetta umhverfi er svo magnað. Ljósmynd/ÁKS

Fram til þessa hefur sjóbirtingsveiðin fyrir austan verið róleg og allir, bæði veiðimenn og fiskar hafa beðið eftir úrkomu og hækkandi vatnsstöðu. Þessi mikla þurrkatíð virðist nú loks á enda.

• Blogga um frétt

Seinustu hundraðkallar sumarsins