Það líður senn að lokum veiðitímans þó svo að enn sé haustveiði víða í gangi og sjóbirtingur á góðu skriði. En við ætlum að byrja að gera upp sumarið 2021 sem mun ekki fara í sögubækurnar fyrir að vera gott laxveiðisumar.
Við höfum hins vegar flutt mikið af ánægjulegum fréttum og þar standa upp úr fréttir af maríulöxum sem var landað víðsvegar um land og stundum voru margir slíkir í einu holli. Flestir veiðimenn muna afar vel hvar þeir tóku maríulaxinn sinn. Aðstæður og tímasetningu. Sporðaköst vilja gjarnan fá myndir af slíkri veiði frá því í sumar og stutta sögu með. Netfangið er eggertskula@mbl.is.
Hér er mynd af ungum veiðimanni sem fékk sinn maríulax í Andakílsá í sumar. Adam Óli Kjartansson átta ára gamall landaði honum í samvinnu við pabba sinni og eldri bróður.
Í sama túr landaði Kjartan Smári Höskuldsson stærsta laxi sumarsins til þessa í Andakílnum. Það var 86 sentímetra hængur sem tók Frances míkró kón í Laugaskarði og eins og Kjartan Smári segir sjálfur í samtali við Sporðaköst; „Það þurfti þrjá fíleflda karlmenn til að klára verkið. En allir lifðu af og honum var sleppt við mikil fagnaðarlæti viðstaddra.“ Kjartan sagði Andakílsána frábæra fyrir fjölskyldur. Gott aðgengi og aðbúnaður og mikið af fiski.
Þó svo að flestar myndir hér í sumar hafi verið af löxum sem náð hafa hundrað sentímetrum og við leyfum okkur að kalla hundraðkalla þá voru margir stórir sem glöddu veiðimenn það sem af er sumri. Hér er til að mynda Erlingur Gunnarsson með stórglæsilegan hæng úr Eystri-Rangá sem mældist 97 sentímetrar. Þessi var tekinn á svæði tvö í Rimahyl og það var rauð Frances, hálf tomma, sem hann lét glepjast af.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Laxá í Dölum | Hafþór Jónsson | 27. ágúst 27.8. |
102 cm | Haukadalsá | Ármann Andri Einarsson | 23. ágúst 23.8. |
103 cm | Laxá í Aðaldal | Birgir Ellert Birgisson | 12. ágúst 12.8. |
103 cm | Miðsvæði Laxá í Aðaldal | Máni Freyr Helgason | 11. ágúst 11.8. |
101 cm | Laxá í Aðaldal | Agnar Jón Ágústsson | 10. ágúst 10.8. |
101 cm | Laxá í Aðaldal | Richard Jewell | 9. ágúst 9.8. |
100 cm | Laxá í Aðaldal | Björgvin Krauni Viðarsson | 9. ágúst 9.8. |