Veiði | mbl | 10.2.2022 | 11:08 | Uppfært 12:41

Andlát: Guðrún E. Thorlacius

Guðrún E. Thorlacius félagi númeri eitt í SVFR er fallin frá. Hún var í sæmd gullmerki félagsins í maí árið 2019. Hér er hún við Elliðaárnar á veiðidegi fyrr á öldinni. Ljósmynd/ES

Guðrún E. Thorlacius er látin. Hún var um árabil félagi númer eitt í Stangaveiðifélagi Reykjavíkur og einn af átján handhöfum gullmerkis félagsins. Jón Þór Ólason, formaður SVFR minnist þessarar merku konu á facebook síðu félagsins, fyrir hönd stjórnar. Þau kveðjuorð fylgja hér.

„Veiðigyðjan Guðrún E. Thorlacius hefur kvatt þennan heim, á 97. aldursári. Hún stendur nú keik og kastar brosandi á safírbláan strenginn á veiðilöndunum fyrir handan, undir fögrum söng mófuglanna. Umgjörð sem hæfir veiðigyðju.

Guðrún var um langt árabil félagi nr. 1 í Stangaveiðifélagi Reykjavíkur, mikilsmetin og dáð í okkar hópi. Hún var fyrsta konan sem skráði sig í SVFR haustið 1941, einungis 16 ára gömul. Var Guðrún því brautryðjandi í karllægum veiðiheimi. Hún var því félagsmaður í SVFR í 81 ár, en félagið var stofnað einvörðungu tveimur árum áður. Enginn félagsmaður hefur því lengur verið í SVFR. Faðir Guðrúnar, Einar Tómasson, kolakaupmaður og stórveiðimaður var ennfremur brautryðjandi enda meðal stofnfélaga SVFR þann 17. maí 1939.

Jón Þór Ólason formaður SVFR sæmdi Guðrúnu gullmerki vorið 2019 og fór athöfnin fram í Baðstofunni eða á sama stað og stofnfundur félagsins var haldinn árið 1939. Jón Þór minnist þessarar merkiskonu á fallegan og hlýlegan hátt fyrir hönd stjórnar SVFR. Ljósmynd/ES

Guðrún veiddi um árabil með föður sínum í Elliðaánum og naut þess að standa á bökkum þessarar perlu Reykjavíkur. Það var vel við hæfi að síðasti lax hennar kom á Breiðunni þann 8. júlí 1994 sem var jafnframt hennar stærsti lax, eða tæp 16 pund. Guðrún kenndi svo eigin afkomendum handtökin við bakka heimavallar SVFR.

Á 80 ára afmæli SVFR 2019 var Guðrún sæmd gullmerki félagsins í Baðstofu iðnaðarmanna, hvar faðir hennar hafði ásamt öðrum stofnað Stangaveiðifélag Reykjavíkur. Guðrún var 18 einstaklingurinn er hlaut þá upphefð og var einstaklega vel að henni komin.

Stjórn Stangaveiðifélags Reykjavíkur þakkar Guðrúnu fyrir samfylgdina og hina miklu tryggð er hún sýndi félaginu. SVFR kveður veiðigyðjuna Guðrúnu E. Thorlacius, félaga nr. 1 með tár á hvarmi og miklu þakklæti. Fjölskyldu Guðrúnar vottum við okkar dýpstu hluttekningar. Guð blessi minningu brautryðjandans Guðrúnar E. Thorlacius, félaga nr. 1.“

Sporðaköst senda fjölskyldu Guðrúnar samúðarkveðjur.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.