Veiðiþættir Bendersins í loftið á morgun

Sónvarpsþáttaserían Veiðin með Gunnari Bender byrjar annað kvöld á Hringbraut. Um er að ræða sex þætti sem teknir voru upp síðasta sumar að mestu leiti. Síðasti þátturinn verður þó tekinn upp nú á vordögum þegar sjóbirtingsveiðin hefst á nýjan leik.

Í fyrsta þættinum er Gunnar Bender viðstaddur opnun í Norðurá í fyrra en þar mætti til leiks Guðni Ágústsson fyrrverandi ráðherra og formaður Framsóknarflokksins.

Fyrsti þáttur er á dagskrá klukkan 19:30 á morgun. Tímasetningin er afar góð enda margir veiðimenn orðnir óþolinmóðir að komast til að veiða.

„Við fórum víða að veiða þegar við tókum upp þættina í fyrra. Þjórsá, Norðurá, Gljúfurá í Borgarfirði, Miðá í Dölum, Leirvogsá og Þingvallavatn svo eitthvað sé nefnt. Við erum með unga veiðimenn sem fara á kostum í þáttunum og svo auðvitað eldri í bland. Það kennir ýmissa grasa og veiðin kemur skemmtilega á óvart. Síðan ætlum að mynda núna í vorveiðinni í síðasta þáttinn. Förum í sjóbirting  þegar snjórinn verður aðeins farinn og fer að hlýna. Ég held að þetta séu þættir fyrir veiðimenn á öllum aldri,“ sagði Gunnar ennfremur.

Áhugavert verður að sjá Össur Skarphéðinsson síðar í seríunni þar sem hann endurnýjar kynni sín við Ísaldarurriða í Þingvallavatni. Össur er mentaður í fiskafræðum og mikill veiðiáhugamaður. Þar verður án ef ekki þverfótandi fyrir fróðleik þegar hann ræðir vatnið, veiðina og lífríkið.

Gunnar Bender hefur titlað sig síðasta móhíkanann í veiðiþáttagerð á Íslandi. Víst er að þetta eru einu sjónvarpsþættir fyrir veiðimenn sem Sporðaköst vita um þetta árið. 

• Blogga um frétt

Seinustu hundraðkallar sumarsins