Veiðitímabilið fór af stað með látum í dag. Víðast hvar voru skilyrði til veiða með besta móti. Hægur vindur og frekar hár lofthiti. Menn voru bókstaflega út um allt að gera ýmist þokkalega veiði eða hreinlega frábæra veiði.
Í Eldvatni byrjaði þetta rólega en þegar hlýnaði eftir því sem leið á daginn færðist fjör í leikinn. Nú undir kvöld var búið að landa tíu birtingum og eins og gefur að skilja missa nokkra mjög stóra. Mest voru púpur að gefa en líka straumflugur.
Tungufljót í Skaftafellssýslu og nágranni Eldvatnsins bauð upp á veislu. Frábær skilyrði voru til veiða og jafnt veiðimenn og fiskar voru hungraðir eftir veturinn. „Ég hef veitt hérna í fimmtán ár og man bara einu sinni eftir svona góðum skilyrðum. Logn og ellefu stiga hiti þegar best lét,“ sagði Sigurður Marcus Guðmundsson í samtali við Sporðaköst um kvöldmatarleitið.
Hollið var komið með þrjátíu fiska og var hann að veiðast víða. „Við fórum í Hlíðarvað og tókum tvo þar. Svo var sennilega fimmtíu fiska torfa við Brúna og við náðum tveimur þar. Ein svakaleg skepna var í þeirri torfu og við giskuðum á að það væri fiskur um meter að lengd."
Hollið tók ákvörðun um að einungis yrði veitt á flotlínur fyrsta daginn og það var heldur betur að virka. Hvítur Nobbler og fleiri hefðbundnar straumflugur gáfu þessa fiska. „Meira að segja einn koma á Sunray,“ sagði Sigurður.
Geirlandsá gaf góða veiði í dag og sama má segja um Tungulæk í námunda við Kirkjubæjarklaustur. Þá fréttum við af mönnum í Hörgsá sem voru að gera góða veiði.
Leirá olli ekki vonbrigðum en nú síðdegis náðu Sporðaköst tali af Hörpu Hlín Þórðardóttur leigutaka og veiðimanni. Hún staðfesti að 22 væru komnir á land. Skilyrði þar voru líka hreint afbragð.
Húseyjarkvísl sveik ekki frekar en fyrri daginn og þar var búið að bók þrettán birtinga um miðjan dag. Varlega má áætla að þeir hafi verið komnir yfir tuttugu talsins þegar degi fór að halla enda skilyrði þar eins og annars staðar, hreint með ólíkindum góð.
Sporðaköst heyrðu í Gunnari Norðdahl en hann skellti sér í Brúará í landi Spóastaða og landaði ásamt félaga sínum fimm fallegum bleikjum. Eins og flestir veiðimenn sem við heyrðum í á opnunardegi dásamaði hann skilyrði til veiða.
Fyrsti birtingurinn úr Ytri–Rangá veiddist í morgun og fékkst hann á Gunnugilsbreiðu. Sá var 71 sentímetri og var það Gísli Már Ágústsson sem veiddi hann. Við höfum ekki heyrt af frekari aflabrögðum þar.
Nánari umfjöllun um opnun á hinum ýmsu svæðum birtist hér á morgun.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Laxá í Dölum | Hafþór Jónsson | 27. ágúst 27.8. |
102 cm | Haukadalsá | Ármann Andri Einarsson | 23. ágúst 23.8. |
103 cm | Laxá í Aðaldal | Birgir Ellert Birgisson | 12. ágúst 12.8. |
103 cm | Miðsvæði Laxá í Aðaldal | Máni Freyr Helgason | 11. ágúst 11.8. |
101 cm | Laxá í Aðaldal | Agnar Jón Ágústsson | 10. ágúst 10.8. |
101 cm | Laxá í Aðaldal | Richard Jewell | 9. ágúst 9.8. |
100 cm | Laxá í Aðaldal | Björgvin Krauni Viðarsson | 9. ágúst 9.8. |