Opnunarhollið í Laxárdalnum fyrir norðan lauk veiðum á hádegi í dag og stóð algerlega undir væntingum. Hollið skilaði veiði upp á 64 fiska en tveir þriðju af aflanum voru fiskar yfir sextíu sentímetra. Laxárdalurinn hefur verið þekktur fyrir að gefa stærri urriða að jafnaði en Mývatnssveitin sem er fyrir ofan Laxárdalinn.
Það er líka þekkt staðreynd að oft er magnið meira upp frá en Laxárdalurinn er kynngimagnað urriðasvæði. Í aflanum voru sex fiskar sem voru sjötíu sentímetrar eða stærri. Sá stærsti í opnunarhollinu mældist 74 sentímetrar.
Af veiðistöðum sem voru að gefa vel er Halldórsstaðahólmi nefndur til sögunnar á facebooksíðu Stangaveiðifélags Reykjavíkur í frétt af opnunarhollinu. Fimm af þessum stærstu veiddust í Halldórsstaðaflóa. Þá voru Kletthólmi og Nónvik einnig að gefa góða veiði.
Það hafa veiðst fleiri fiskar í opnun í Laxárdalnum en þessi meðalþyngd er hreint út sagt frábær og eins og einn grínistinn komst að orði þá er meðal stærðin orðin meiri en í laxveiðiánum í Borgarfirði.
Eins og við höfum sagt frá þá opnaði Mývatnssveitin með miklum látum og hátt í fimm hundruð urriðar veiddust í opnunarhollinu. Þá hafa Torfurnar nokkuð fyrir neðan Laxárdalinn einnig verið að gefa góða veiði. Framunda er áhugavert sumar í urriðanum í Laxá, hvað sem gerist svo neðar í ánni.
Lengd á laxi | Veiðisvæði | Veiðimaður | Dagsetning Dags. |
---|---|---|---|
102 cm | Hvítá við Iðu | Ársæll Þór Bjarnason | 19. september 19.9. |
101 cm | Víðidalsá | Stefán Elí Stefánsson | 4. september 4.9. |
101 cm | Laxá í Dölum | Hafþór Jónsson | 27. ágúst 27.8. |
102 cm | Haukadalsá | Ármann Andri Einarsson | 23. ágúst 23.8. |
103 cm | Laxá í Aðaldal | Birgir Ellert Birgisson | 12. ágúst 12.8. |
103 cm | Miðsvæði Laxá í Aðaldal | Máni Freyr Helgason | 11. ágúst 11.8. |
101 cm | Laxá í Aðaldal | Agnar Jón Ágústsson | 10. ágúst 10.8. |