Loksins, loksins lax úr Blöndu

Fyrsta laxinum úr Blöndu var landað í morgun. Mönnum var verulega létt og ekki spillti fyrir að laxar sáust á nokkrum stöðum. Í Holunni, Dammnum og rétt í þessu þrír á Breiðunni að sunnanverðu. Hann virðist loks vera að mæta með vaxandi straumi.

Það var þýski veiðimaðurinn Detlef Fischer sem setti í og landaði 93 sentímetra laxi í morgun á Breiðunni að sunnan. Einn lax var misstur í gærkvöldi en Detlef landaði sínum fyrsta laxi á Íslandi og er óhætt að fullyrða að gleðin var meiri en hann sjálfur átti von á.

„Það var mjög ánægjulegt að sjá fyrsta laxinum landað, loksins. Við sáum fiska á nokkrum stöðum í morgun þannig að við erum spenntir fyrir næstu dögum,“ sagði Erik Koberling í samtali við Sporðaköst skömmu eftir að fyrsti laxin var kominn í bók.

Í samtalinu við Erik sá hann þrjá aðra laxa á Breiðunni og það dró ekki úr ánægjunni. Blanda opnaði 5. júní og mörgum var hætt að lítast á blikuna þar sem að lítið hafði sést af fiski. Vera kann að straumurinn sem nú er að bresta á í vikunni sé straumurinn sem fyrstu fiskarnir eru að ganga í. Síðasti stóri straumur var fyrir um hálfum mánuði og kannski var hann aðeins of snemma. En allavega Blanda er komin á blað og spennandi verður að sjá hvernig framhaldið verður. Hvort hann er að mæta í einhverju magni eða bíða þurfi smálaxins til að veiðin verði sæmandi Blöndu eins og menn þekkja hana.

• Blogga um frétt

Seinustu hundraðkallar sumarsins