Fyrsti laxinn sem vitað er um úr Sandá í Þjórsárdal kom á land í dag. Það var Dagur Árni Guðmundsson sem setti í hann og landaði á klettinum fyrir neðan göngubrúna. Fiskurinn tók skærgrænan chartruse Sunray.
„Hnýtti þessa bara fyrir svona sólríka daga og virkar greinilega. Ég sá laxinn af klettinum fyrir neðan göngubrú. Kastaði nokkrum þyngdum conehead túbum á hann og ekkert gekk. Skautaði þessari svo yfir hann á yfirborðinu og hann kom upp og negldi hana. Ég þurfti að klifra niður klettinn og náði að halda honum í hylnum og háfaði hann áður en hann rauk niður,“ sagði Dagur Árni í samtali við Sporðaköst.
Hann titlar sig veiðimann og leiðsögumann en það þurfti allt að ganga upp til að þessi fiskur kæmi í háfinn. Dagur Árni er lofthræddur en samt klifraði hann niður af klettinum og einn síns liðs háfaði hann laxinn með annarri hendi og stöngina í hinni. „Sem betur fer náði ég að háfa hann áður en hann rauk niður úr. Þá hefði ég sennilega aldrei náð honum.“
Þetta er stærsti lax sem hann hefur veitt og mældist hann 99,4 sentímetrar. „Ég mældi hann svona þrjátíu sinnum. Hann er 99,4 sentímetrar. Ég var að vona að hann næði meternum en það var ekki. Er svo geggjaður fiskur og ég er þvílíkt ánægður með hann.“
Lengd á laxi | Veiðisvæði | Veiðimaður | Dagsetning Dags. |
---|---|---|---|
100 cm | Mýrarkvísl | Tim Racie | 23. júlí 23.7. |
102 cm | Víðidalsá | Ragnheiður Þengilsdóttir | 14. júlí 14.7. |
106 cm | Laxá í Aðaldal | Kristrún Ólöf Sigurðardóttir | 8. júlí 8.7. |
100 cm | Blanda | Patrick Devennie | 20. júní 20.6. |
100 cm | Kjarrá | Sigurður Smári Gylfason | 19. júní 19.6. |
Veiðiárið 2023: | |||
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |