Stórfiskasería að hætti Eyjafjarðarár

Eyjafjarðará er ein besta silungsveiðiá landsins. Hvar á landinu og jafnvel í heiminum geta menn landað 72 sentímetra bleikju og 73 sentímetra sjóbirtingi í sömu vikunni? Þetta afrekaði Aron Sigurþórsson í Eyjafjarðará.

Þetta er ein stærsta bleikja sem Sporðaköst hafa frétt af í sumar. Mældist 72 sentímetrar og tók Squirmy á Jökulbreiðu. Ljósmynd/AS

Hann veiddi efsta svæðið í Eyjafjarðará, svæði fimm, í gær og landaði sex bleikjum. Svona lítur serían út. 72, 65, 53, 50, 47 og 45 sentímetra bleikjur. Sú stærsta sem mældist 72 sentímetrar veiddist á Jökulbreiðu og tók þá sívinsælu flugu Squirmy wormy. 65 sentímetra bleikjan tók líka Squirmy. Þessar minni komu svo á Vinyl púpur og Pheasant tail. Hann fékk fiska í Bakkahyljum og Úlfarskrókum og missti tvo í Ármótum, þar sem Torfufellsáin kemur út í Eyjafjarðarána, en það er magnaður veiðistaður.

Þessi bleikja mældist 65 sentímetrar og tók líka hina vinsælu Squirmy. Ljósmynd/AS

Eyjafjarðaráin er vatnsmikil en var ekki lituð. Aðeins var grámi í Torfufellsánni en það gerði þetta bara veiðilegra.

Síðastliðinn föstudag var Aron einnig á ferðinni í Eyjafjarðaránni og veiddi þá neðsta svæðið eða svæði núll. Við gömlu brúna við flugvöllinn setti hann svarta straumflugu undir og fljótlega setti hann í vænan fisk. Þetta reyndist 73 sentímetra langur sjóbirtingur sem var „spiiiiikaður“ eins og hann skrifaði í skilaboðun til Sporðakasta. Þetta var fyrsta heimsókn Arons á bæði þessi svæði en áður hafði hann aðeins veitt svæði þrjú. Hann sagðist jafnframt hafa þegið góð frá Benjamín Þorra Bergssyni sem þrátt fyrir ungan aldur er þaulkunnugur ánni.

• Blogga um frétt

Seinustu hundraðkallar sumarsins