Stærsti lax sumarsins til þessa í Kjarrá, eða Kjarará eins og margir vilja kalla hana, veiddist í Lambastreng í gær. Það var Tryggvi Ársælsson sem setti þennan volduga hæng og landaði honum. Flugan var lítill rauður Frances kónn.
Tryggvi og félagar vönduðu til mælinga á laxinum og mældist hann 100,5 sentímetrar og færist hann til bókar á hundraðkallalista Sporðakasta sem 100 sentímetrar. Að sögn Tryggva var skítaveður á veiðimönnum í Kjarrá. Rok og rigning. Veiðin í hollinu var ágæt að hans sögn án þessar að nokkrar tölur væru nefndar. Þetta er annar hundraðkallinn sem veiðist á vatnasvæðinu, en neðri hluti árinnar, Þverá gaf einn slíkan upp á 104 sentímetra snemmsumars. Sá fiskur gæti mælst 107 eða 108 sentímetrar veiðist hann aftur nú síðsumar þegar krókódílatíminn hefst í september.
Veiðin í Þverá/Kjarrá hefur verið aðeins betri í sumar en í fyrra og var þegar síðustu tölur voru birtar á vef Landssambands veiðifélaga komin í 1.151 lax. Á sama tíma í fyrra voru þær í rétt rúmlega þúsund löxum. Þetta er annað árið í röð sem bati er í veiðinni á þessum slóðum.
Lengd á laxi | Veiðisvæði | Veiðimaður | Dagsetning Dags. |
---|---|---|---|
100 cm | Mýrarkvísl | Tim Racie | 23. júlí 23.7. |
102 cm | Víðidalsá | Ragnheiður Þengilsdóttir | 14. júlí 14.7. |
106 cm | Laxá í Aðaldal | Kristrún Ólöf Sigurðardóttir | 8. júlí 8.7. |
100 cm | Blanda | Patrick Devennie | 20. júní 20.6. |
100 cm | Kjarrá | Sigurður Smári Gylfason | 19. júní 19.6. |
Veiðiárið 2023: | |||
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |