Haust hinna stóru sjóbirtinga framundan?

Sjóbirtingum sem mælast yfir áttatíu sentímetrar og jafnvel yfir níutíu hefur fjölgað umtalsvert hin síðari ár. Það er óumdeilt að þetta megi rekja til veiða/sleppa fyrirkomulags sem hefur síðasta áratug rutt sér til rúms í nær öllum sjóbirtingsám. Birtingurinn er með allt annað lífshlaup en laxinn. Sá fyrrnefndi gengur oft á lífsleiðinni upp í ána sína og hrygnir. Laxinn aftur á móti kemur einu sinni og skilar næstu kynslóð. Flestir drepast eftir hrygningu en þar eru þó undantekningar á og nokkur dæmi þekkt um hrygnur sem hafa komið tvisvar til hrygningar og jafnvel oftar.

Í sjóbirtingnum er þetta hins vegar þekkt staðreynd að þeir koma aftur og aftur og verða þá líka með árunum stærri. Það sást vel í vorveiðinni í ár hversu mikið var af þessum stóru birtingunum sem voru að ganga niður eftir ástarævintýri vetrarins.

Stærsti birtingurinn úr Vatnamótum í sumar fær frelsi á nýjan leik. Þessi mældist 93 sentímetrar og það hann Maros sem veiddi hann. Ljósmynd/Maros

Eldvatnið hefur verið að skila stærri og stærri fiskum. Þannig veiddust í vor margir níutíu sentímetra fiskar og ríflega það. Nú í lok ágúst veiddist svo sá stærsti á þessu ári og var það 94 sentímetra fiskur sem gaf sig í veiðistaðnum Villa. Töluvert hefur verið af frásögnum veiðimanna úr Eldvatninu af fiskum sem hafa haft betur í viðureign við veiðimenn og sagði mjög stórir. Það er í sjálfu sér ósköp eðlilegt að fiskar sem eru komnir í níutíu sentímetra plús flokkinn og ný komnir úr hafi, séu erfiðir viðureignar.

Bæði Vatnamótin og Tungufljót hafa gefið fiska í þessari stærð í haust. Þann 11. ágúst var 97 sentímetra birtingi landað í Tungufljóti og þar var að verki góðkunningi Sporðakasta Maros Zatko að verki. Þessi fiskur er sá stærsti sem komið hefur á land í Tungufljóti í ár. Hann veiddist í Syðri – Hólma.

Maros setti í annað tröll á öðrum stað, aðeins austar og landaði 93 sentímetra birtingi í Vatnamótum 26 ágúst.

Guðjón Snorri Þóroddsson með 94 sentímetra sjóbirting sem hann veiddi á svæði eitt í Eyjafjarðará í ágúst. Stórum birtingum þar hefur fjölgað eins og svo víða. Ljósmynd/GSÞ

Eyjafjarðará hefur líka verið að gefa fiska í þessum stærðarflokki í vaxandi mæli. Guðjón Snorri Þóroddsson veiddi 94 sentímetra birting á svæði eitt síðari hluta ágúst mánaðar og tók sá fiskur Rauðan Ghost. Í byrjun tímabils í vor komu margir stórir birtingar úr Eyjafjarðaránni.

Þá er ónefnd Húseyjarkvísl í Skagafirði sem er öflug sjóbirtingsá. Þar að sama skapi hefur stórum birtingum fjölgað og var sérstaklega tekið eftir því í vor hversu vel haldnir birtingarnir voru þar.

Nú þegar besti tíminn í sjóbirtingi er að renna upp verður gaman að sjá hvað skilar af þessum allra stærstu. Á sama tíma er jákvætt að sjá að smærri birtingur er að veiðast í öllum þessum ám og er það gott merki um að nýjar kynslóðir eru á sínum stað.

• Blogga um frétt

Seinustu hundraðkallar sumarsins