Tungufljót gaf aftur tröllvaxinn birting

Tungufljótið er svo sannarlega að standa undir væntingum veiðimanna þegar kemur að stórfiski. Tveir stærstu sjóbirtingar sem veiðst hafa í haust veiddust báðir þar. Sá þriðji bættist í hópinn í gær og er sá næst stærsti.

Arnór Gunnarsson kom að Hlíðavaði um miðjan dag í gær með leiðsögumanninum Birki Mar Harðarsyni sem í sumar hefur verið við leiðsögn í Stóru – Laxá. Arnór setti undir Olive Ghost straumflugu, sem vel að merkja að allir sem kasta fyrir urriða eða sjóbirting ættu að eiga í boxinu. Fljótlega tók fiskur straumfluguna og það var þung taka.

Birtingurinn var marg mældur og þeir félagar kölluðu til félaga sína til að vera vitni að mælingunni. Ljósmynd/BMH

Viðureignin stóð í góðan hálftíma og báðir höfðu þeir tekið andköf eftir að hafa séð fiskinn vel. Birkir Mar hefur séð marga stóra í sumar og þessi silungur gaf ekkert eftir í stærð í samburði við þá stærstu í Stóru – Laxá.

Það kom líka á daginn að þessi sjógengni silungur var eins stór og þeir gerast. Mældist hundrað sentímetrar. Marg mældur og með fjölda vitna. Hann var vigtaður í háfnum og pundmælirinn sýndi 24 pund.

Birkir Mar sagði í samtali við Sporðaköst að þetta hefði verið magnaður fiskur. „Við geymdum hann nokkra stund í háfnum eftir að við höfðum landað honum. Við hringdum í félaga okkar sem voru skammt frá okkur og vildum fá fleiri vitni,“ upplýsti hann.

Sporðtakið hjá Arnóri segir allt um stærðina á þessum fiski. Þeir tóku ekki ummál á honum en hann vigtaði 24 pund í háfnum. Ljósmynd/BMH

Þetta er annar sjóbirtingurinn í haust sem nær meternum. Hinn veiddist líka í Tungufljóti og við sögðum einmitt frá honum í gær. Þetta er svo sannarlega haust hinna stóru sjóbirtinga.

Birkir Mar sagði mikið af fiski í Tungufljótinu en hann hafði ekki heildartölu yfir veiðina í haust. „Þetta var síðasti dagurinn minn í leiðsögn þetta árið og það var ótrúlega gaman að enda þetta með svona mögnuðu ævintýri.“

• Blogga um frétt

Seinustu hundraðkallar sumarsins