Allra stærstu sjóbirtingunum fjölgar

Sífellt fleiri sjóbirtingar í yfirstærð hafa verið að veiðast hin síðari ár. Einn slíkur veiddist í Tungulæk í gær og er sá fiskur merkilegur fyrir nokkurra hluta sakir.

Í fyrsta lagi er það stærðin eða lengdin en fiskurinn mældist hundrað sentímetrar og hafa slíkir drekar verið mjög sjaldgæfir og eru það í raun enn. Hins vegar hefur sjóbirtingum í þessum stærðarflokki verið að fjölga hin síðari ár og mörgum ætti enn að vera í fersku minni 107 sentímetra birtingurinn sem Stefán P.Jones veiddi í fyrrahaust í Tungufljóti. Þá mældu teljarar í Vatnsá fiska yfir 110 sentímetra.

Þykktin á stirtlunni segir í raun allt sem segja þarf um þennan magnaða fisk sem vældist 100 sentímetrar. Staðfest af fjölda vitna. Ljósmynd/Teddi

Það var Hafþór Hallsson sem veiddi sjóbirtinginn í Tungulæk í gær og tók hannBlackGhost í Vatnamótum. Hafþór komst þar með í flokk manna sem hafa veitt bæði lax og sjóbirting sem ná þessari lengd. Þeir eru ekki margir veiðimennirnir sem uppfylla inntökuskilyrði í þann klúbb. Sporðaköst vita um einn annan veiðimann, en það er Theodór K. Erlingsson sem einmitt aðstoðaði við löndun á þessum magnað hæng í gær.

Mynd frá 1992 þegar Hafþór veiddi 102 sentímetra lax í Tunguá, hliðará Grímsár. Sá tók maðk og þarna má sjá glitta í þá gömlu góðu græju Ambassador veiðihjól. Ljósmynd/Hafþór Hallsson

Mælingin er óumdeild og voru bæði lögreglumaður og starfsmaður Vinnueftirlitsins viðstaddir mælinguna og staðfestu hana. Hafþór var í góðan hálftíma með þennan mikla hæng áður en hann náðist til myndatöku og mælingar. Honum var svo sleppt eins og lög gera ráð fyrir.

Hafþór veiddi 102 sentímetra lax í Tunguá, sem er hliðará Grímsár í Borgarfirði. Þetta var árið 1992 og tók sá fiskur maðk. Þar með er staðfest að Hafþór er gjaldgengur í þennan fámenna merkisklúbb.

Hausinn á þessum stórfiskum er engin smásmíði. Allt að því forneskjulegir í útliti. Ljósmynd/Teddi

Teddi, sem er hinn meðlimurinn sem Sporðaköst vita af veiddi einmitt sinn hundrað sentímetra sjóbirting líka í Tungulæk fyrir tveimur árum. Hann hafði áður veitt lax sem stóð meter.

Veiðin er áfram góð í Tungulæk þó hún hafi róast eftir stóra hollið sem við sögðum frá í gær.

Sporðaköst óska eftir því að fá upplýsingar um ef fleiri veiðimenn hafa afrekað að landa bæði hundrað sentímetra laxi og sjóbirtingi.

332 fiskar hafa nú verið skráðir í veiðibók í Tungulæk og er það mögnuð veiði á tíu dögum þegar vitað er að aðstæður hafa verið mjög erfiðar suma daga. 

• Blogga um frétt

Seinustu hundraðkallar sumarsins