Laxinn löngu mættur í Stóru – Laxá

Hópur á vegum árnefndar sem voru við störf í Stóru – Laxá um helgina sáu laxa á nokkrum stöðum. Formaður árnefndar, Jóhann Gunnlaugsson ásamt Hrafni H. Haukssyni voru við merkingar á efra svæðinu í Stóru.

„Já. Að sjálfsögðu skimuðum við eftir laxi og það er talsvert af fiski þegar kominn upp eftir. Við sáum víða laxa og mest á Hólmasvæðinu. Á Hólmabreiðu lágu sjö laxar og tveir þeirra voru gríðarvænir. Á meðan við drukkum kaffisopa og dáðumst að þessum glæsilegu fiskum, bættust allt í einu tveir í hópinn,“ sagði Hrafn í samtali við Sporðaköst.

Það vakti sérstaklega athygli viðstaddra að tveir af þessum fiskum voru greinilega farnir að taka lit svo nokkuð er síðan að þeir fiskar mættu. „Þetta veit á eitthvað gríðarlega gott,“ fullyrti Hrafn.

Hér er svo annar. Það þarf að hitta á rétt skilyrði svo að myndir skili því sem menn sjá. Hér leynir sér ekki að lax liggur fyrir ofan stóra grjótið. Ljósmynd/Jóhann Gunnlaugsson

Stóra – Laxá skilaði betri veiði í fyrra en mörg árin þar á undan. Samtals veiddust 934 laxar í henni í fyrra. Fara þarf aftur til áranna 2013 og 2014 til að finna viðlíka veiði í henni. Margt jákvætt hefur einmitt gerst í umhverfi Stóru – Laxár. Netauppkaup í Ölfusá og nú síðast breyttar reglur í Hvítá við Iðu þar sem fiski verður sleppt í sumar í meira mæli en áður hefur þekkst. En er rúmlega hálfur mánuður í opnun í Stóru og miðað við lýsingar árnefndarmanna verður það spennandi opnun.

• Blogga um frétt

Seinustu hundraðkallar sumarsins