Veiði | mbl | 21.6.2023 | 9:13

Haustaði yfir laxveiðina fyrir norðan

Aron Pálmarsson með fyrsta lax sumarsins úr Laxá í Aðaldal sumarið 2023. Þessi veiddist í Hólatagli og mældist 85 sentímetrar. Ljósmynd/Laxá í Aðaldal

„Þetta var stutt sumar,“ varð veiðimanni að orði sem var að kasta fyrir lax í Víðidalsá í gær. Hitastigið var tvær gráður. Áin bólgin af vatni. Drjúgmikil rigning og vindur af norðri. Haustveður og auðvelt að kenna það við september eða jafnvel október.

Við þessar aðstæður opnaði Vatnsdalsá og Laxá í Aðaldal. Menn höfðu verið bjartsýnir fyrir opnun enda töluvert sést af laxi í báðum ám á þeim örfáu sumardögum sem höfðu viðkomu á Norðurlandi.

Skemmst er frá því að segja að enginn lax veiddist í Vatnsdalsá á fyrstu vakt. Í Laxá í Aðaldal komu fjórir á land á fyrstu vakt, sem var seinnipartinn í gær.

Um svipað leiti og Ronaldo landsleikjahæsti maður Portúgal fagnaði ólöglegu sigurmarki í Laugardalnum gegn Íslandi var annar íþróttakappi og öllu hærra skrifaður, að minnsta kosti á Íslandi að opna „markareikninginn sinn“ í Laxá í Aðaldal. Þar var á ferðinni Aron Pálmarsson sem setti í og landaði 85 sentímetra laxi í Hólmatagli á Silver Gray flugu númer 10.

Þá veiddust tveir laxar í Grástraumi og sá fjórði kom af Breiðunni.

Veðurspár gera ráð fyrir betra veðri á morgun og svo blíðu í framhaldinu af því. Kannski kemur þá annar í sumri fyrir norðan.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.