Snjóar inn fleiri veiðimönnum

Opnað er fyrir veiði í sífellt fleiri laxveiðiám þessa dagana og veiðimönnum við störf fjölgar hratt og örugglega. Fjöldi þeirra tvöfaldast nú vikulega enda margar stangir að bætast við. Vatnsdalsá er að taka á móti fyrstu veiðimönnunum og fyrstu laxarnir hafa þar litið dagsins ljós. Veiðimönnum hefur bókstaflega snjóað inn og margir á faraldsfæti. Bæði í silungs– og laxveiði.

Björn K. Rúnarsson og María Valgarðsdóttir áttu flottan morgun á neðsta hluta laxasvæðisins. Fengu bæði lax og kom annar í Hnausastreng og hinn úr Hólakvörn. Þessir fallegu nýrenningar stóðust þó ekki samanburð við ótrúlega þykkan og flottan sjóbirting sem Björn fékk í Hnausastreng. Hann mældist níutíu sentímetrar og magnað eintak eins og sést á meðfylgjandi mynd.

Þessi sjóbirtingur er engin smásmíði og mældist 90 sentímetrar. Þykkur og magnaður fiskur. Björn K. Rúnarsson veiddi hann í Hnausastreng. Ljósmynd/María Valgarðsdóttir

Opnunin í Vatnsdal varð ofurlítið veðrinu að bráð eins og gerðist víða um vestanvert Norðurland síðustu daga. Það horfir þó allt til bóta og sumarið virðist vera að ná vopnum sínum á nýjan leik.

Björn með smálax úr Vatnsdalsá. Hann er að mæta óvenju snemma og það veit oftast á gott þegar smálaxinn er með fyrra fallinu. Ljósmynd/María Valgarðsdóttir

Í Hrútafirði eru menn að veiðum en eins og í Vatnsdalnum er opnunarholl þar í gangi. Haukadalsá, Ölfusá og raunar ýmsar fleiri hafa glatt veiðimenn síðasta sólahringinn með fyrstu löxunum. Laxá í Dölum opnar á laugardag og styttist í Stóru – Laxá í Hreppum.

Næstu spennandi augnablik í þessu verða svo opnanir í ám á NA–landi þegar Hofsá, Selá, Miðfjarðará, Sandá og Svalbarðsá mæta til leiks.

• Blogga um frétt

Seinustu hundraðkallar sumarsins